கரோனா வைரஸ் பரவல் காரணமாக கடந்த மார்ச் மாதம் 20ஆம் தேதி முதல் மாநிலத்தில் உள்ள அனைத்துக் கோயில்களும் மூடப்பட்டு பக்தர்கள் வருகைக்குத் தடை விதிக்கப்பட்டிருந்தது.
இந்நிலையில், ஊரடங்கில் பல தளர்வுகள் அளிக்கப்பட்டதைத் தொடர்ந்து, செப்டம்பர் ஒன்றாம் தேதி முதல் அனைத்து வழிபாட்டுத் தலங்களையும் திறக்க அரசு உத்தரவளித்தது. அதைத் தொடர்ந்து, ஐந்து மாதங்களுக்குப் பிறகு நேற்று(செப்.1) கோயில்கள் திறக்கப்பட்டு, பக்தர்கள் வழிபட அனுமதியளிக்கப்பட்டது.
இந்நிலையில், நேற்று ராமேஸ்வரம் ராமநாதசுவாமி கோயிலில் பக்தர்கள் காலை 6 மணி முதல் கிருமி நாசினி கொண்டு கைகளைத் தூய்மை செய்தல், முகக் கவசம் அணிதல், உடல் வெப்பம் பரிசோதனை செய்தல் ஆகிய வழிகாட்டு நெறிமுறைகளைப் பின்பற்றி வழிபாடு செய்தனர்.
கோயில் நிர்வாகம் அளித்த தகவலின்படி வெளிமாவட்டம், மாநிலங்களைச் சேர்ந்த இரண்டாயிரத்து 200 பக்தர்கள் நேற்று சுவாமி தரிசனம் செய்தது தெரிகிறது.
