ஊரக உள்ளாட்சித் தேர்தல் நேற்று முதல்கட்டமாக தமிழ் நாடு முழுவதும் நடைபெற்றது. புதுக்கோட்டை மாவட்டம் கறம்பக்குடி, குன்னாண்டார் கோயில், விராலிமலை உள்ளிட்ட ஆறு பகுதிகளில் தேர்தல் விறுவிறுப்பாக நடைபெற்றது.
புதுக்கோட்டையில் மாலை 4 மணிவரை 71% வாக்குப்பதிவாகி உள்ளது. விராலிமலையில் உள்ள நீர்பழனி அருகே பெரியமூளிப்பட்டியில் உள்ள அரசு பள்ளியில் மாலை 5 மணியுடன் வாக்குப்பதிவு நிறைவு பெற்றதை அடுத்து வாக்குப் பெட்டியை சீல் வைத்து அலுவலர்கள் எடுத்து செல்ல முற்படும்போது, மதுபோதையில் இருந்த மூர்த்தி என்பவர் பெட்டியை அங்கிருந்து தூக்கி சென்றதால் பரபரப்பு ஏற்பட்டது.
இதனை அடுத்து கீரனூர் காவல்துறையினருக்கு தகவல் கொடுக்கப்பட்டு சம்பவ இடத்திற்கு புதுக்கோட்டை மாவட்ட காவல்துறை கண்காணிப்பாளர் அருண் சக்திகுமார் வந்து விசாரணை நடத்தினார்.
மூர்த்தி என்பவர் ஒரு தரப்பினருக்கு ஆதரவாக வாக்குப் பெட்டியை மதுபோதையில் தூக்கி சென்று அரை கிலோ மீட்டர் தூரத்தில் பெட்டியை முள்புதரில் போட்டுவிட்டு அதன் அருகிலேயே படுத்து தூங்கி உள்ளார்.
இதனால் அப்பகுதியில் சோதனை செய்த காவல்துறையினர் அவரை பிடித்து அவரிடமிருந்து கைப்பற்றிய வாக்குப் பெட்டியையு மீண்டும் பள்ளியில் கொண்டு வந்து வைத்தனர். அதன் பின் வாக்கு எண்ணும் இடத்திற்கு எடுத்துச் செல்லப்பட்டது. அதையடுத்து மூர்த்தியை கைது செய்த காவல்துறையினர் விசாரணை மேற்கொண்டு வருகின்றனர்.
இதையும் படியுங்க: தேர்தல் பறக்கும் படைகள் சுற்றிப்பிடித்த பொருட்களின் விவரம்!
