புதுக்கோட்டை: பாஜக தமிழ்நாடு தலைவர் அண்ணாமலை கடந்த 28ஆம் தேதி முதல் "என் மண்... என் மக்கள்" என்ற நடைபயணம் மேற்கொண்டு வருகிறார். இன்று 6-வது நாள் நடைபயணமாக புதுக்கோட்டை மாவட்டம், திருமயம் சட்டப்பேரவைத் தொகுதியில் அவர் மக்களைச் சந்தித்தார்.
இதனை முன்னிட்டு சிவகங்கை மாவட்டம், காரைக்குடியில் இருந்து திருமயம் வந்த அண்ணாமலைக்கு திருமயம் கோட்டை அருகே பாஜகவினர் வெடிகள் வெடித்து மேளதாளங்கள் முழங்க மாலை அணிவித்து உற்சாக வரவேற்பு அளித்தனர். மேலும் பெண்கள் முளைப்பாரி எடுத்தும் மலர்த்தூவியும் ஆட்டம் பாட்டத்துடன் அண்ணாமலையை வரவேற்றனர்.
திருச்சி - ராமேஸ்வரம் தேசிய நெடுஞ்சாலையில் உள்ள திருமயம் பிரிவு சாலையில், இருந்து நடை பயணத்தை தொடங்கிய அண்ணாமலை திருமயம் கோட்டை, கடைவீதி, பாப்பாவயல், தகர கொட்டகை உள்ளிட்டப் பகுதிகள் வழியாக நடைபயணமாக வந்து மோடி அரசின் 9 ஆண்டுகள் கால சாதனைகள் குறித்து மக்களிடம் எடுத்து கூறியதோடு பொதுமக்கள், வர்த்தகர்கள் மற்றும் பெண்களிடம் அவர்களுக்கான பிரச்னைகள் குறித்து கேட்டு அறிந்தார்.
அதனைத் தொடர்ந்து செய்தியாளர்களைச் சந்தித்த அண்ணாமலை, "நான் தொடங்கியுள்ள பாதயாத்திரைக்கு மக்கள் மத்தியில் பெரும் வரவேற்பு கிடைத்துள்ளது. சாதாரண மக்கள் கூட பங்கேற்று எனக்கு ஆதரவு தெரிவித்துள்ளனர்.
என் மீது விமர்சனங்கள் வைக்க வைக்க, நான் வளர்கிறேன் என்று அர்த்தம். வருகின்ற நாடாளுமன்றத் தேர்தலில் 40க்கு 40 தொகுதிகளிலும் வெற்றி பெற வேண்டும் என்பது தான் எங்களது இலக்கு. நாங்கள் எந்த கட்சியையும் போட்டியாக கருதவில்லை. தேசிய ஜனநாயக கூட்டணி வருகின்ற நாடாளுமன்றத் தேர்தலில் 40 தொகுதிகளில் வெற்றி பெற வேண்டும் என்பதுதான் இலக்கு. அதை நோக்கி தான் பயணிக்கிறோம்.
ஓபிஎஸ் உள்ளிட்டோரை நாங்கள் ஒதுக்கவில்லை. அதிமுகவில், ஓபிஎஸ் உள்ளிட்டவர்கள் விரக்தி எல்லாம் அடையவில்லை. அவர்கள் மக்களுக்காக பாடுபட்ட பெரும் தலைவர்கள், மக்கள் பணி செய்தவர்கள். தொடர்ந்து மக்களுக்காக பாடுபட்டு வருபவர்கள். அதிமுகவோடு நாங்கள் அதிகாரப்பூர்வமாக கூட்டணி வைத்துள்ளோம். யாரையும் ஒதுக்கவில்லை. யாரும் வருத்தப்படவும் தேவையில்லை.
திமுக செய்யும் தவறுகளை குற்றச்சாட்டுகளாக மட்டுமின்றி ஆதாரப்பூர்வமாக வெளியிட்டு வருகின்றோம். முதல் ஃபைல் மக்களுக்கு விழிப்புணர்வை ஏற்படுத்துவதற்காக வெளியிடப்பட்டது. இரண்டாவது ஃபைல் நடவடிக்கை எடுப்பதற்காக வெளியிடப்பட்டது. விரைவில் மூன்றாவது பட்டியல் வெளியாகும்.
ஆட்சியில் உள்ளவர்களின் தவறை சுட்டிக்காட்டுவது தான் எனது வேலை. நான் ஆளுநரிடம் கொடுத்துள்ள குற்றச்சாட்டுகள் குறித்து அவர் நடவடிக்கை எடுப்பார் என நம்புகிறேன்.
கார்த்தி சிதம்பரம், ப.சிதம்பரம் குடும்பமே ஊழல் குடும்பம். ஐஎன்எக்ஸ் மற்றும் சாரதா வழக்கு தான் இருப்பதிலேயே பெரிய வழக்குகள். அப்படியான வழக்குகள் இருக்கும்போது, அவர்கள் எப்படி ED-யை ஆதரிப்பார்கள். வேண்டாம் என்றுதான் சொல்லுவார்கள்.
234 தொகுதிகள் உள்ளது. பாதயாத்திரை ஜனவரி 11 வரை இருக்கிறது. இது பெரியார் மண்ணா என்பது குறித்து எனது பாதயாத்திரை முடிந்த பின்பு தெரியும். கோடநாடு குறித்து நான் கருத்து சொல்ல என்ன இருக்கிறது. அரசு உள்ளது, காவல்துறை உள்ளது. அவர்கள் நடவடிக்கை எடுப்பார்கள். திமுக எந்த ஒரு தேர்தல் வாக்குறுதியையும் நிறைவேற்றவில்லை.
வருகின்ற நாடாளுமன்றத் தேர்தலுக்கு எங்களுடன் யார் வந்தாலும் ஏற்றுக் கொள்வோம். கதவுகள் திறந்து தான் உள்ளது. யார் வேண்டுமானாலும் கூட்டணிக்கு வரலாம். வருகின்ற நாடாளுமன்றத் தேர்தலில் நான் எங்கும் போட்டியிடவில்லை. எனக்கு கட்சிப் பணிகள் அதிகமாக உள்ளது" எனத் தெரிவித்தார்.
இதையும் படிங்க: பாஜகவில் இணைந்த நடிகர் விஜயின் அம்மா!
