பெரம்பலூர் மாவட்டத்திலுள்ள குரும்பலூர் பேரூராட்சியில் இரண்டாயிரத்துக்கும் மேற்பட்ட குடும்பங்கள் வசித்து வருகின்றார்கள். இந்நிலையில் குரும்பலூர் பேரூராட்சிக்கு உட்பட்ட அனைத்து வார்டுகளிலும் கடந்த 20 நாட்களுக்கு மேலாக முறையான குடிநீர் வழங்கவில்லை.
இதனால் ஆவேசமடைந்த குரும்பலூர் பேரூராட்சி மக்கள் குடிநீர் பிரச்னையை சரி செய்யக்கோரி காலி குடங்களுடன் பெரம்பலூர்-துறையூர் சாலையில் அமர்ந்து சாலை மறியலில் ஈடுபட்டனர். சாலை மறியலின்போது குரும்பலூர் பேரூராட்சி நிர்வாகத்தை கண்டித்து கோஷங்களை எழுப்பினர்.
தகவல் அறிந்து சம்பவ இடத்திற்கு விரைந்து வந்த காவல்துறையினர் கிராம மக்களிடம் சாலைமறியல் போராட்டத்தைக் கைவிடுமாறு கூறினர். ஆனால் பேச்சுவார்த்தையில் எந்தவொரு முன்னேற்றமும் ஏற்படவில்லை.
பின்னர் பேரூராட்சி அலுவலர்கள் குடிநீர் பிரச்னையை தீர்ப்பதாக வாக்குறுதியளித்ததையடுத்து குரும்பலூர் பேரூராட்சி மக்கள் சாலை மறியல் போராட்டத்தைக் கைவிட்டனர்.
