நாமக்கல் மாவட்ட ஆட்சியர் அலுவலகத்தில் ஆட்சியர் மெகராஜ் தலைமையில் அனைத்து வணிகர்கள் சங்க கூட்டமைப்பினருடனான ஆலோசனைக் கூட்டம் நடைபெற்றது. இந்தக் கூட்டத்தில் நாமக்கல் மாவட்டத்தைச் சேர்ந்த பல்வேறு வணிக சங்கங்களின் பிரதிநிதிகள் நூற்றுக்கும் மேற்பட்டோர் பங்கேற்றனர். மாவட்ட நிர்வாகம் அறிவித்துள்ள வழிகாட்டு நெறிமுறைகளில் எழுந்துள்ள சந்தேகங்களுக்கு விளக்கம் அளிக்கும் வகையில் இந்தக் கூட்டம் நடந்தது.
இதனைத் தொடர்ந்து செய்தியாளர்களிடம் பேசிய அவர், ”தமிழ்நாடு அரசு அறிவித்துள்ள ஊரடங்கு தளர்வினையடுத்து 34 வகையான தனிக்கடைகள் இயங்க அனுமதி வழங்கப்பட்டுள்ளது. இந்த தனிக்கடைகளுக்கு வரும் வாடிக்கையாளர்கள் முகக்கவசம் அணிந்திருக்க வேண்டும். சோப்பு பயன்படுத்தி கைகளை தூய்மைப்படுத்த வேண்டும், தகுந்த இடைவெளி பின்பற்ற வேண்டும் என கூட்டத்தில் அறிவுறுத்தப்பட்டது.
இதனை கடைப்பிடிப்பதாக வணிகர்கள் ஒப்புதல் வழங்கியுள்ளனர். மேலும், கடைகளில் பணிபுரியும் ஊழியர்களும், உரிமையாளர்களும் இதனை பின்பற்ற வேண்டும். இந்த விதிமுறைகளை பின்பற்றாத வாடிக்கையாளர்களுக்கு பொருள்களை வழங்ககக்கூடாது என அறிவுறுத்தப்பட்டுள்ளது. அதுமட்டுமின்றி, அரசின் வழிமுறைகளை பின்பற்றாத கடைகளுக்கு சீல் வைக்கப்படும்” என்றார்.
மேலும் பேசிய அவர், மாவட்டத்தில் 21 பகுதிகள் கட்டுப்பாட்டு மண்டலங்களாக இருந்த நிலையில் 4 பகுதிகளுக்கு தளர்வு அளிக்கப்பட்டுள்ளது. மாவட்டத்தில் இருந்து பிற மாநிலங்களுக்கு இதுவரை 600 பேர் அனுப்பி வைக்கப்பட்டுள்ளர். வெளி மாநிலத்தில் இருந்து நாமக்கல் மாவட்டத்திற்கு திரும்ப 760 பேர் பதிவு செய்துள்ளனர் எனவும் அவர் தெரிவித்தார்.
இதையும் படிங்க: விதிமுறைகளை மீறிய அரசு மதுபான கடைகளுக்குச் சீல்!
