நாமக்கல் மாவட்டம் புதன்சந்தை அடுத்த எஸ். உடுப்பம் பகுதியில் ஊராட்சி ஒன்றியத் தொடக்கப்பள்ளி செயல்பட்டு வருகிறது. இப்பள்ளியில் பணியாற்றி வரும் ஆசிரியர் சரவணனும் அதேப் பள்ளி வளாகத்தில் செயல்பட்டுவரும் அங்கன்வாடி மையத்தின் அங்கன்வாடி அமைப்பாளரான ஜெயந்தியும் பள்ளி வளாகத்திலேயே பாலியல் உறவில் ஈடுபட்டதாகக் கூறி பொதுமக்கள் ஆசிரியர் சரவணனுக்கு தர்ம அடி கொடுத்து புதுச்சத்திரம் காவல்நிலையத்தில் ஒப்படைத்தனர்.
இந்நிலையில் நாமக்கல் அரசு மருத்துவமனையில் ஆசிரியர் சரவணன் அனுமதிக்கப்பட்டுச் சிகிச்சை பெற்றுவருகிறார்.
இந்தச் சம்பவம் குறித்து ஆசிரியர் சரவணன் தெரிவித்ததாவது, பள்ளி வளாகத்தில் நடந்த தாக்குதலுக்கு தலைமையாசிரியர் தன் மீது கொண்ட காழ்ப்புணர்ச்சியே காரணம். தான் பட்டியல் இனத்தை சார்ந்தவன் என்பதால், இந்த தாக்குதல் நடத்தப்பட்டதாகவும் இதற்கு அரசு உரிய விசாரணை மேற்கொண்டு நடவடிக்கை எடுக்க வேண்டும் என்றார்.
மேலும் இது குறித்து மாவட்டக் கல்வி அலுவலர் உதயகுமாரிடம் கேட்ட போது, இச்சம்பவம் குறித்து புதுச்சத்திரம் வட்டாரக் கல்வி அலுவலர் கோபாலகிருஷ்ணன் அவர்கள் சம்பவம் குறித்து பள்ளி மாணவர்கள், ஆசிரியர், தலைமையாசிரியர், பெற்றோர், ஊர்மக்களிடம் விசாரணை மேற்கொண்டு அறிக்கைத் தாக்கல் செய்ய உத்தரவிட்டுள்ளதாகவும், அறிக்கையின் அடிப்படையில் சம்பந்தப்பட்ட ஆசிரியர் மீது துறை ரீதியான நடவடிக்கை எடுக்கப்படும் எனவும் தெரிவித்தார்.
ஆசிரியர் சரவணன் 2012ஆம் ஆண்டு பொருளாதாரத்தில் பின்தங்கிய மாணவர்களுக்கு வழங்கப்படும் உதவித்தொகையை கையாடல் செய்த குற்றச்சாட்டில் முதல் குற்றவாளியாக வழக்குப்பதிவு செய்யப்பட்டு பணியிடை நீக்கம் செய்யப்பட்ட வழக்கு நீதிமன்றத்தில் நடைபெற்று வருவது குறிப்பிடத்தக்கது.
