நாமக்கல்: மோகனூர் மேட்டுத்தெரு பகுதியை சேர்ந்தவர் குமார் என்கின்ற தில்லை குமார். இவருக்கு திருமணமாகி பிரியா என்ற மனைவியும் ஐந்து வயதில் பெண்குழந்தையும் உள்ளது. தில்லைகுமார் மோகனூரிலும் ஓலப்பாளையத்திலும் அரசின் உரிமம் பெற்று பட்டாசு கடை நடத்தி வந்துள்ளார்.
இந்நிலையில் நாளை(ஜன.1-2023) புத்தாண்டு என்பதால் அதிகப்படியான பட்டாசுகள் விற்பனையாகும் என நினைத்த தில்லை குமார் பல்வேறு மாவட்டங்களில் இருந்து அதிகப்படியான பட்டாசுகளை வாங்கி தனது வீட்டில் குவித்து வைத்துள்ளார். இந்த சூழலில் இன்று (டிச.31)அதிகாலை 3.30 மணியளவில் வீட்டில் இருந்த பட்டாசுகள் அதிக சத்தத்துடன் வெடித்து சிதறியது. இந்த வெடி விபத்தில் வீட்டில் இருந்த தில்லை குமார், அவரது மனைவி பிரியா, அவரது தாயார் செல்வி மற்றும் அண்டை வீட்டை சேர்ந்த பெரியக்காள் ஆகியோர் சம்பவ இடத்திலேயே பரிதாபமாக உயிரிழந்தனர்.
இதில் தில்லை குமாரின் வீடு தரை மட்டமானது. மேலும் அப்பகுதியில் உள்ள 10க்கும் மேற்பட்ட வீடுகள் சேதமடைந்ததுடன் வீட்டில் உறங்கி கொண்டிருந்த 5 பேர் படுகாயமடைந்தனர். சம்பவம் குறித்து தகவல் அறிந்து வந்த தீயணைப்பு துறையினர் 3 தீயணைப்பு வாகனங்கள் மூலம் தீயை அணைத்தனர். மேலும் இடிபாடுகளில் சிக்கியுள்ளவர்களை பொக்லைன் இயந்திரம் மூலம் மீட்டனர். இந்த விபத்தில் அதிர்ஷ்டவசமாக தில்லை குமாரின் 5 வயது மகள் லேசான காயத்துடன் உயிர் தப்பினார்.
சம்பவம் குறித்து வழக்கு பதிவு செய்த மோகனூர் போலீசார் தீவிபத்து குறித்த காரணங்கள் விசாரணை மேற்கொண்டு வருகின்றனர். மேலும் காவல்துறையினர் மேற்கொண்ட முதற்கட்ட விசாரணையில் தில்லை குமார் பட்டாசுகள் விற்பனை செய்வதுடன் திருவிழா காலங்களில் தோரணமாக கட்டப்படும் நாட்டு வெடிகளை தயாரிக்கும் பணிகளை செய்து வந்ததாக கூறப்படுகிறது.
இவைகள் அனைத்தும் அவரது வீட்டிலேயே மேற்கொண்டு வந்ததாகவும் அதிகப்படியான பட்டாசுகள் ஒன்றன் மேல் ஒன்றாக குவித்து வைத்ததால் அழுத்தம் ஏற்பட்டு விபத்து ஏற்பட்டிருக்கலாம் என சந்தேகிக்கப்படுகிறது. அதுமட்டுமின்றி பட்டாசுகளுடன் வீட்டில் இருந்த சிலிண்டரும் வெடித்ததால் தீ வேகமாக பரவத் தொடங்கியதாகவும் கூறப்படுகிறது.
புத்தாண்டிற்கு அதிகப்படியான பட்டாசுகளை விற்பனை செய்யலாம் என்ற ஆசையில் வீட்டில் குவித்து வைத்திருந்த பட்டாசுகளால் தில்லை குமாரின் உயிரை மட்டுமின்றி அவரது குடும்பத்தினரும் பலியானது அப்பகுதியினரிடையே சோகத்தை ஏற்படுத்தியுள்ளது.
இதையும் படிங்க:பேருந்து ஓட்டுநருக்கு மாரடைப்பு.. கோர விபத்தில் சிக்கி 10 பேர் உயிரிழப்பு..
