இது குறித்து அவர் நமக்கு அளித்த பிரத்யேக பேட்டியில், ”நான் வெற்றிபெற்றால் பல ஆண்டுகளாக கிடப்பில் போடப்பட்ட திருமணிமுத்தாறு திட்டம் நிறைவேற்றப்படும். நாமக்கல் மாவட்டத்தைப் பொறுத்தவரை பிரதான தொழில்களான முட்டை ஏற்றுமதியும், லாரி போக்குவரத்து தொழிலும், ஜவுளித் தொழிலும் உள்ளது. தற்போது இந்தத் தொழில்கள் அனைத்தும் நலிவுற்றுள்ளன. ஜிஎஸ்டி வரி விதிப்பால் ஜவுளித் தொழில் மிகவும் முடங்கியுள்ளது. நான் வெற்றிபெற்றால் இதில் உள்ள அனைத்து பிரச்னைகளும் தீர்த்து வைக்கப்படும்.
ராஜவாய்க்கால் பிரச்னையும் முட்டை உற்பத்தியில் உள்ள பிரச்னைகளும் களையப்பட்டு தீர்வு காணப்படும். அதேபோல் காவிரி ஆற்றின் கரையோரம் தடுப்பணைகளை அமைத்து விவசாய பாசனத்திற்கு வழிவகை செய்யப்படும். இவையனைத்துமே தற்போது நாமக்கல் மாவட்ட மக்களின் பிரதான கோரிக்கையாக உள்ளது. எனவே அனைத்தையும் நிறைவேற்றுவேன் என்ற நம்பிக்கை உள்ளது.
என்னைப் பொறுத்தவரை அரசியல் வாழ்க்கையில் சாதனை செய்யமுடியாது என்பது இல்லை. நிச்சயமாக அனைவராலும் சாதிக்க முடியும். அரசியலில் சம்பாதிக்க வரவில்லை. வேட்பாளராக இருக்கும் இந்த நிலையில் எவ்வித ஊழல் இல்லாமல் தேர்தலை சந்திக்க உள்ளேன். வெற்றிபெற்ற பிறகும் என்னுடைய பைகளை நிரப்ப மாட்டேன்; எவ்வித ஊழலிலும் ஈடுபடமாட்டேன் என சத்தியப்பிரமாணம் எடுத்துள்ளேன்.
என்னுடைய பதவியை ஒருபோதும் துஷ்பிரயோகம் செய்யமாட்டேன். என்னுடைய சொந்த பணிக்காகக்கூட அரசியல் வாகனத்தில் பயணிக்க மாட்டேன். எவ்வித சாதி பாகுபாடின்றி அனைவருக்கும் உழைப்பேன். மற்ற மக்களவை உறுப்பினர்களுக்கு முன்மாதிரியாக திகழ்வேன். இந்தியாவின் குடியரசு முன்னாள் தலைவர் அப்துல் கலாம் இறந்தபிறகும் அவரது புகழ் நிலைத்துள்ளதுபோல் என்னுடைய புகழும் நிலைத்துநிற்க பாடுபடுவேன்” என்றார்.
