மயிலாடுதுறை: தரங்கம்பாடி தாலுக்கா குட்டியாண்டியூர் மீனவ கிராமத்தை சேர்ந்தவர் விஜய். இவர் பொறையார் பகுதியில் ஒரு இடம் வாங்கி, அந்த இடத்தை தனது மனைவி நாகலெட்சுமி பெயரில் பட்டா மாற்றம் செய்யவும், சிறு விவசாயிக்கான சான்று வழங்கக் கோரியும் பொறையாறு கிராம நிர்வாக அலுவலகத்தில் விண்ணப்பம் அளித்து உள்ளார்.
பொறையாரில் பொறுப்பு கிராம நிர்வாக அலுவலராக, காளியப்பநல்லூர் கிராம நிர்வாக அலுவலர் பாண்டியராஜன் என்பவர் பணியில் இருந்துள்ளார். இந்த நிலையில், பாண்டியராஜன் பட்டா பெயர் மாற்றம் மற்றும் சிறு விவசாயிகளுக்கான சான்றுக்கு பரிந்துரை செய்ய 2 ஆயிரத்து 500 ரூபாய் லஞ்சம் கேட்டதாக கூறப்படுகிறது. .
அதை தொடர்ந்து, விஜய் மயிலாடுதுறை லஞ்ச ஒழிப்பு பிரிவு போலீசாரிடம் இது குறித்து புகார் அளித்து உள்ளார். ரசாயனம் தடவிய 2 ஆயிரத்து 500 ரூபாயை விஜயிடம் வழங்கிய லஞ்ச ஒழிப்பு பிரிவு போலீசார், அதை கிராம நிர்வாக அலுவலரிடம் கொடுக்க சொல்லி அனுப்பி வைத்து உள்ளனர்.
இந்நிலையில், விஜய் தனது மனைவி நாகலட்சுமியுடன் பொறையாறு கிராம நிர்வாக அலுவலகத்திற்கு சென்றுள்ளார். அங்கு இருந்த கிராம நிர்வாக அலுவலர் பாண்டியராஜனிடம் பணத்தை கொடுத்துள்ளார்.
இதையும் படிங்க: துபாயில் இருந்து சென்னைக்கு தங்கம் கடத்தல்... கடத்தல் தங்கத்தை கைமாற்ற முயன்ற விமான நிலைய ஒப்பந்த ஊழியர் கைது!
பணத்தை பாண்டியராஜன் வாங்கிய போது அங்கு மறைந்து இருந்த மயிலாடுதுறை லஞ்ச ஒழிப்பு பிரிவு டிஎஸ்பி மனோகரன் தலைமையிலான போலீசார் கிராம நிர்வாக அலுவலகத்திற்குள் அதிரடியாக நுழைந்து பாண்டியராஜனை கையும் களவுமாக பிடித்து அலுவலகத்திற்கு உள்ளே வைத்து விசாரணை செய்து வந்தனர்.
சுமார் 10 மணி நேர விசாரணைக்குப் பிறகு கிராம நிர்வாக அலுவலர் பாண்டியராஜனை கைது செய்து வாகனத்தில் அழைத்து சென்று மயிலாடுதுறை நீதிமன்றத்தில் ஆஜர்படுத்திய லஞ்ச ஒழிப்புத் துறை போலீசார், அவரை சிறையில் அடைத்தனர். லஞ்சம் வாங்கிய குற்றத்திற்காக கிராம நிர்வாக அலுவலர் கையும் களவுமாக கைது செய்யப்பட்ட சம்பவம் அப்பகுதியில் உள்ள மக்களிடம் பரபரப்பை ஏற்படுத்தி உள்ளது.
இதையும் படிங்க: வெளி மாநிலங்களுக்கு போதைக் காளான் பார்சல்.. ஒரே குடும்பத்தைச் சேர்ந்த 2 பெண்கள் உட்பட மூவர் கைது.. கொடைக்கானலில் நடந்தது என்ன?
