நாகை ரயில் நிலையம் முன்பு உள்ள மறைமலை அடிகளார் வாடகை ஓட்டுநர் உரிமையாளர் நலச்சங்கத்தில் நூற்றுக்கும் மேற்பட்ட ஓட்டுநர்கள், வாடகை கார், வேன் உள்ளிட்டவற்றை ஓட்டி வருகின்றனர். அதே பகுதியில் சொந்தமாக வாகனம் வைத்துள்ள வாகன ஓட்டுநர்கள் சிலர் கடந்த வாரம் ரயில் நிலையம் முன்பு சட்டத்திற்கு புறம்பாக கொட்டகை அமைத்தனர். இந்நிலையில், கொட்டகையை நீக்குமாறு வாடகை ஓட்டுநர் நலச்சங்கத்தினர் அவர்களிடம் முறையிட்டபோது, கொட்டகையை அமைத்தவர்கள் அலட்சியமான பதிலை அளித்துள்ளனர்.
இதனால், ஆத்திரமடைந்த வாடகை ஓட்டுநர் நலச்சங்கத்தினர் கொட்டகையை அப்புறப்படுத்தினர். இதையடுத்து சொந்தமாக வாகனங்கள் வைத்திருக்கும் ஓட்டுநர்களில் சிலர், குடி போதையில் நாகையைச் சேர்ந்த பாலகிருஷ்ணன், காளிதாஸ், மகேந்திரன் ஆகியோரின் நான்கு வாடகை வாகனங்களை கற்கள், இரும்பு ஆயுதங்கள் கொண்டு சரமாரியாக தாக்கி துவம்சம் செய்தனர். இதில், தாக்குதலுக்குள்ளான நான்கு வேன்களின் கண்ணாடிகள் முற்றிலும் உடைந்து பலத்த சேதமடைந்தது.
மேலும், மறைமலை அடிகளார் நலச்சங்கத்தின் அலுவலகத்தின் இரும்பு தகர சீட்டுகளை அரிவாளால் வெட்டியும் அச்சங்கத்தின் பெயர் பலகைகளை பெயர்த்து எறிந்தும் சூறையாடினர். இதனால், அதிர்ச்சியடைந்த வாடகை கார், வேன் ஓட்டுநர்கள் நலச் சங்கத்தினர், சமூக விரோதிகளை உடனடியாக கைது செய்ய வேண்டும் என்றும் பாதிக்கப்பட்டவர்களுக்கு அவர்களிடமிருந்து இழப்பீடு வாங்கி தர வேண்டும் என்றும் நாகப்பட்டினம் காவல் நிலையத்தில் புகார் மனு அளித்துள்ளனர்.
நாகை ரயில் நிலையத்திற்கு எதிரே உள்ள காவல் நிலையத்தின் இரண்டு சிசிடிவி கேமராக்களை ஆராய்ந்தபோது சமூகவிரோதிகள் தைரியமாக இந்த செயலை செய்துள்ளது கண்டுபிடிக்கப்பட்டுள்ளது.
