ஊரடங்கு உத்தரவை மீறி கடைகளில் குவியும் மக்கள்!

நாகப்பட்டினம்: மயிலாடுதுறையில் ஊரடங்கு உத்தரவை மதிக்காமல் போக்குவரத்து நெரிசல் ஏற்படும் அளவுக்கு கடை வீதிகளில் மக்கள் குவிவது சமூக ஆர்வலர்களிடையே அதிருப்தியை ஏற்படுத்தியுள்ளது.

நாகை மாவட்டம் மயிலாடுதுறையில் ஊரடங்கு உத்தரவை மதிக்காமலும், சமூக விலகலைக் கடைப்பிடிக்காமலும் அத்தியாவசிய பொருள்களை வாங்குவதற்காக பொதுமக்கள் கடைவீதிகளில் அதிக அளவில் கூடுவதால் போக்குவரத்து நெரிசல் ஏற்பட்டது.

ஊரடங்கு உத்தரவை கடைப்பிடிக்கும் நடவடிக்கையாக மயிலாடுதுறை நகராட்சிக்கு உட்பட்ட 36 வார்டுகளை மூன்று பிரிவுகளாகப் பிரித்து அத்தியாவசியப் பொருள்களை வாங்குவதற்காக வாரத்திற்கு இரண்டு நாள்கள் மட்டுமே வீட்டை விட்டு வெளியே வர அரசு நிர்வாகத்தினர் அனுமதி வழங்கியுள்ளனர்.

வீட்டுக்கு ஒருவர் மட்டுமே வர வேண்டும் என்றும், மீறினால் நடவடிக்கை எடுக்கப்படும் என்றும் எச்சரிக்கை விடுக்கப்பட்டுள்ளது. ஆனால், இவை எதையும் கடைப்பிடிக்காமல் பெரிய கடை வீதி, பட்டமங்கல தெரு, பேருந்து நிலையம் ஆகிய பகுதிகளில் பொதுமக்கள் அத்தியாவசிய பொருள்களை வாங்குவதற்காக எவ்வித அச்ச உணர்வுமின்றி குவிந்தனர்.

பெரிய கடை வீதியில் இருசக்கர வாகனங்களில் செல்வோர் எண்ணிக்கை அதிகரித்ததால் போக்குவரத்து நெரிசல் ஏற்பட்டது. வங்கியில் சமுதாய விலைகளைக் கடைப்பிடிக்காமல் ஒருவரை ஒருவர் உரசியபடி அச்ச உணர்வின்றி நிற்கின்றனர்.

கரோனா முன்னெச்சரிக்கை விழிப்புணர்வாக பல்வேறு நடவடிக்கைகளை மேற்கொண்டு வரும் அரசு அலுவலர்கள், காவல் துறையினர் தீவிர நடவடிக்கை எடுத்தால் மட்டுமே ஊரடங்கு உத்தரவு வெற்றியடையும் என்று சமூக ஆர்வலர்கள் கூறுகின்றனர்.

இதையும் படிங்க: ஊரடங்கிலும் இறைச்சிக் கடைகளில் அலைமோதும் கூட்டம்.!