அழுகிய பயிரை கையில் கொண்டு வந்து கதறிய விவசாயி

மயிலாடுதுறை ஆட்சியர் அலுவலகத்தில் நடைபெற்ற விவசாயிகள் குறைதீர்க்கும் கூட்டத்தில் அழுகிய பயிரை கையில் கொண்டு வந்து அனைத்து விவசாயிகளுக்கும் உரிய நிவாரணம் வழங்க வேண்டும் என கேட்டுக்கொண்டார்.

மயிலாடுதுறை: மாவட்ட ஆட்சியர் அலுவலக கூட்டரங்கில் நடைபெற்ற விவசாயிகள் குறைதீர்க்கும் கூட்டம் மாவட்ட ஆட்சியர் லலிதா தலைமையில் நடைபெற்றது. இந்த கூட்டத்தில் வேளாண்துறை அதிகாரிகள் பலர் கலந்து கொண்டனர். தொடர்ந்து மயிலாடுதுறை, சீர்காழி, குத்தாலம், தரங்கம்பாடி உள்ளிட்ட பகுதிகளில் இருந்து வருகை தந்த விவசாயிகள் தங்களது குறைகளை மாவட்ட ஆட்சியரிடம் தெரிவித்தனர்.

மேலும் தரங்கம்பாடி தாலுக்கா திருக்கடையூர் பகுதியை சேர்ந்த விவசாயி ராமமூர்த்தி கையில் வேர்கள், அழுகிய சம்பா பயிரை எடுத்து வந்து தண்ணீரில் முழுவதுமாக பயிர்கள் மூழ்கியதால் வீணாகிவிட்டதாகவும் , அதனால் தாங்கள் நஷ்டமடைந்துவிட்டதாகவும் கூறினார்.

மேலும் மயிலாடுதுறையை பேரிடர் பாதித்த மாவட்டமாக அறிவித்து அனைத்து விவசாயிகளுக்கும் நிவாரணம் வழங்க வேண்டும் என மாவட்ட ஆட்சியரிடம் கேட்டுக் கொண்டார். பின்னர் மாப்படுகை பகுதி விவசாயி இராமலிங்கம் கூட்டத்தில் தனது கருத்துக்களை தெரிவித்தார்.

அப்போது மாவட்ட ஆட்சியர் தன் கோரிக்கையை கண்டு கொள்ளாமல் அலட்சியமாக அமர்ந்திருக்கிறார் எனவும், ஆகையால் மாவட்ட வருவாய் அலுவலரிடம் எனது கருத்துக்களை தெரிவிக்கிறேன் எனவும் கூறியது பரபரப்பை ஏற்படுத்தியது.

இதையும் படிங்க: ரேஷன் அட்டைகளுக்கு ரூ.1000 - அரசாணை வெளியீடு!