விவசாயிகள் நீதியின் மீது நம்பிக்கை வைக்க வேண்டும் - உயர்நீதிமன்ற நீதிபதி கோரிக்கை!

நாகப்பட்டினம் மாவட்ட பெட்ரோல் கார்ப்பரேஷன் நிறுவனத்திற்கு எதிராகப்போராட்டம் நடத்த அனுமதி மறுத்த சென்னை உயர்நீதிமன்றம், விவசாயிகள் நீதியின் மீது நம்பிக்கை வைக்க வேண்டும் என அறிவுறுத்தியுள்ளது.

சென்னை: நாகப்பட்டினம், முட்டத்தில் செயல்பட்டு வரும் சென்னை பெட்ரோலியம் கார்ப்பரேஷன் லிமிடெட் நிறுவனத்தின் சுத்திகரிப்பு நிலையத்தை விரிவுபடுத்தும் நோக்கில் பனங்குடி, நரிமணம் மற்றும் கோபுராஜபுரம் கிராமங்களில் இருந்து சுமார் 600 ஏக்கர் நிலத்தை கையகப்படுத்த கடந்த 2017ஆம் ஆண்டு அறிவிப்பு வெளியிடப்பட்டது.

30 ஆண்டுகளுக்கு முன், இந்நிறுவனத்தை அமைக்க கையகப்படுத்தப்பட்ட நிலங்களுக்கு இன்னும் இழப்பீடு வழங்கப்படாத நிலையில், விரிவாக்கத்துக்காக நிலம் கையகப்படுத்த அப்பகுதி மக்கள் எதிர்ப்புத்தெரிவித்து வருகின்றனர்.

இருப்பினும் கையகப்படுத்தும் பணிகள் முடிவடைந்து, அரசிடம் நிலம் ஒப்படைக்கப்பட்ட நிலையில் தங்களது நிலத்திற்கு உரிய இழப்பீடு வழங்கக்கோரி நிலம் வழங்கிய சிலர் சென்னை உயர் நீதிமன்றத்தில் வழக்குகள் தொடர்ந்திருந்தனர்.

அந்த வழக்குகள் நிலுவையில் உள்ள நிலையில் உரிய இழப்பீடுகோரி நாகூர் அருகே, ஒரு மாத காலம் தொடர் போரட்டம் நடத்த அனுமதிகோரி உயர் நீதிமன்றத்தில் மனுதாக்கல் செய்தனர். அந்த மனுவை விசாரித்த தனி நீதிபதி, போராட்டம் நடத்த அனுமதி வழங்கி உத்தரவிட்டார். இதை எதிர்த்து நாகப்பட்டினம் மாவட்ட எஸ்.பி. சார்பில் மேல்முறையீடு செய்யப்பட்டது.

அதில், ஒரு மாத கால தொடர் போராட்டத்தால் சட்டம்- ஒழுங்கு பிரச்னை ஏற்படும் என்பதை கருத்தில் கொள்ளாமல் தனி நீதிபதி போராட்டத்திற்கு அனுமதி அளித்துள்ளதாகத் தெரிவித்துள்ளார்.

இந்த வழக்கு உயர் நீதிமன்ற தலைமை நீதிபதி முனீஷ்வர்நாத் பண்டாரி மற்றும் நீதிபதி பரதச்சக்கரவர்த்தி அமர்வில் விசாரணைக்கு வந்த போது, தமிழ்நாடு அரசின் தலைமை வழக்கறிஞர் சண்முகசுந்தரம், நிலம் அளித்தவர்களுக்கு நியாயமான இழப்பீடு வழங்கப்படும் என உறுதி தெரிவித்தார்.

இதையடுத்து, இழப்பீடு கோரிய வழக்குகளின் முடிவுக்காக காத்திருக்காமல், போராட்டத்தில் ஈடுபடுவதில் எந்த அர்த்தமும் இல்லை என தெரிவித்த நீதிபதிகள், இழப்பீடு கோரிய வழக்கு விசாரணைக்கு எடுத்துக்கொள்ளும் வரை, தங்கள் கோரிக்கையை ஏற்றுக்கொள்ள நிர்பந்திக்கும் வகையில் போராட்டத்தில் ஈடுபடக்கூடாது, என உத்தரவிட்டனர்.

மேலும், நீதியின் மீது நம்பிக்கை வைத்து, நாள் முழுவதும் சாமியானவுக்கு கீழ் அமர்ந்து சிரமப்படாமல், விவசாயிகள் விவசாயத்தை மேற்கொள்ள வேண்டும் எனவும் அறிவுறுத்திய நீதிபதிகள், வழக்கு விசாரணையை ஆகஸ்ட் 12ஆம் தேதிக்கு தள்ளிவைத்தனர்.

இதையும் படிங்க: 'குற்ற வழக்குகளுக்கு பொதுமக்கள் சாட்சிகளாக முன்வருவதில்லை' - வருந்திய உயர் நீதிமன்ற நீதிபதி!