மயிலாடுதுறை: மேகேதாட்டுவில் காவிரி ஆற்றின் குறுக்கே அணை கட்டும் முயற்சியில் ஈடுபடும் கர்நாடக அரசைக் கண்டித்து காவிரி ஆற்றில் இறங்கி கறுப்புக் கொடி ஏந்தி உழவர்கள், பொதுமக்கள் போராட்டத்தில் ஈடுபட்டனர்.
மேலும் காவிரி வல்லுநர் குழுவைக் கலைத்த மத்திய அரசைக் கண்டித்தும் போராடினர். இப்போராட்டமானது தேசிய தென்னிந்திய நதிகள் இணைப்பு விவசாய சங்க மாவட்டத் தலைவர் ராமலிங்கம் தலைமையில் நடைபெற்றது. போராட்டத்தின்போது,
- தடுத்திடு தடுத்திடு கர்நாடகாவில் அணை கட்டுவதைத் தடுத்திடு,
- திரும்பப் பெறு திரும்பப் பெறு புதிய வேளாண் சட்டங்களைத் திரும்பப் பெறு
என்று மத்திய அரசைக் கண்டித்து கோஷங்கள் எழுப்பினர். மேலும் டெல்லியில் போராடும் உழவர்களுக்கு ஆதரவாகவும் முழக்கங்களை எழுப்பினர்.
10 லட்சம் ஏக்கர் நிலத்தில்தான் வேளாண்மை
போராட்டத்திற்குப் பிறகு செய்தியாளர்களைச் சந்தித்த தேசிய தென்னிந்திய நதிகள் இணைப்பு விவசாய சங்க மாவட்டத் தலைவர் ராமலிங்கம், “70 ஆண்டுகளுக்கு முன்பு கர்நாடகாவில் மூன்று லட்சம் ஏக்கர் நிலத்தில் வேளாண்மை நடந்தது.
ஆனால் இன்று 30 லட்சம் ஏக்கர் நிலத்தில் வேளாண்மை நடத்தும் வகையில் சிறு, சிறு அணைகளைக் கட்டி நீரினைத் தேக்கிக் கொண்டுள்ளனர்.
ஆனால் தமிழ்நாட்டில் 30 லட்சம் ஏக்கர் நிலத்தில் வேளாண்மை நடந்த இடத்தில் தற்போது 10 லட்சம் ஏக்கர் நிலத்தில்தான் வேளாண்மை நடந்துகொண்டிருக்கிறது. இதற்கே நீர் இல்லை. மேலும் குடிநீர் பஞ்சம் வேறு. இதுபோன்று பல பிரச்சினைகளைச் சந்திக்கின்றோம்.
'அணை கட்டியே தீருவோம்' - சர்வாதிகாரப் போக்கு
இதற்கு கர்நாடக அரசு பாசனப்பகுதிகளில் நீர்வரத்து உள்ள இடத்தில் தடுப்பணைகள் கட்டுவதுதான் காரணம். இது மட்டும் போதாது என்று எண்ணிய கர்நாடக அரசு தற்போது மேகேதாட்டு என்ற அணை கட்டும் முயற்சியில் ஈடுபட்டுவருகின்றது.
இதனை உச்ச நீதிமன்றம் ஒரு வல்லுநர் குழு அமைத்து அணை கட்டாமல் கண்காணிக்கும் வகையில் வைத்திருந்தனர். இதனை எட்டு நாள்களுக்கு முன்பு ஒன்றிய அரசு கலைத்துவிட்டது. மேலும் கர்நாடக அரசு அணையைக் கட்டியே தீருவோம் என்று சர்வாதிகாரமாகக் கூறுகின்றனர்.
தடுத்து நிறுத்த முதலமைச்சரே முயற்சி எடுங்க
இந்த அணையைக் கட்டினால் ஒரு லட்சம் ஏக்கர் நிலத்தில் உழவுத் தொழில் செய்ய முடியாத நிலை ஏற்படும். மேலும் குடிநீர் பஞ்சம் அதிகரித்து மக்கள் உயிரிழக்கும் சூழல் ஏற்படும்.
இதனைத் தமிழ்நாடு முதலமைச்சர் தடுத்து நிறுத்துவதற்கு, அவரால் முடிந்த முயற்சியை எடுக்க வேண்டும் என உழவர்கள் சார்பில் கேட்டுக்கொள்கிறோம்” என்றார்.
