ஒரே தண்டவாளத்தில் இரண்டு ரயில்கள் வந்த விவகாரம் - ரயில்வே மேலாளர் பணியிட மாற்றம்!

மதுரை: ஒரே தண்டவாளத்தில் இரண்டு ரயில்கள் நேருக்கு நேர் வந்த விவகாரத்தில் மூன்று ரயில்வே அலுவலர்கள் பணியிடை நீக்கம் செய்யப்பட்ட நிலையில், மதுரை கோட்ட இயக்க மேலாளர் தற்போது பணியிட மாற்றம் செய்யப்பட்டுள்ளார்.

மதுரை அருகே உள்ள கள்ளிக்குடியில் கடந்த 8ஆம் தேதியன்று சிக்னல் மற்றும் மொழி பிரச்னையால் ஒரே தண்டவாளத்தில் எதிர் எதிரே இரண்டு ரயில்கள் வந்த சம்பவம் பரபரப்பை ஏற்படுத்தியது. எனினும், ரயில் ஓட்டுநர்கள் சுதாரித்ததால் பெரும் விபத்து தவிர்க்கப்பட்டது. இதையடுத்து, கவனக்குறைவாக செயல்பட்ட, கள்ளிக்குடி ரயில் நிலைய அலுவலர் தீப் சிங், திருமங்கலம் ரயில் நிலைய அலுவலர் ஜெயக்குமார், ரயில் கட்டுப்பாட்டு அறை அலுவலர் முருகானந்தம் உட்பட 3 பேரை பணியிடை நீக்கம் செய்யப்பட்டனர்.

தொடர்ந்து இச்சம்வம் குறித்து ரயில்வே தலைமை பாதுகாப்பு அலுவலர் ஆர்.கே.மேத்தா தலைமையிலான உயர்மட்டக் குழு விசாரணை நடத்தியது. இந்நிலையில், தற்போது மதுரை கோட்ட இயக்க மேலாளர்(ஒருங்கிணைப்பு) பிரேம்குமார், திருச்சிக்கு பணியிட மாற்றம் செய்து தெற்கு ரெயில்வே பொது மேலாளர் ராகுல் ஜெயின் உத்தரவிட்டுள்ளார்.