மதுரை: காணாமல் போன தனது மகளை (சிறுமி) கண்டுபிடித்து ஆஜர்படுத்தக் கோரி மதுரை மாவட்டத்தைச் சேர்ந்த ஒருவர், உயர் நீதிமன்ற மதுரைக் கிளையில் மனு அளித்திருந்தார்.
இந்நிலையில் நேற்று (ஜூன் 20) மீண்டும் விசாரணைக்கு வந்தது, இந்த வழக்கு. விசாரித்த நீதிபதிகள், குழந்தை கடத்தல் விசாரணைக் காலத்தை நீட்டிக்கவிடாமல் அதற்குரிய விசாரணை மற்றும் நடவடிக்கைக்கு வேண்டிய அவசியம் உள்ளது எனத் தெரிவித்துள்ளது.
இந்த மனு நீதிபதிகள் சுரேஷ்குமார், ராமகிருஷ்ணன் ஆகியோர் முன் மீண்டும் விசாரணைக்கு வந்தது, இந்த வழக்கில் நீதிபதிகள் சிறுமிகள் கடத்தப்படுவது குறித்து பல்வேறு கேள்விகளை எழுப்பி இருந்தனர். இதற்கு தமிழ்நாடு அரசு தொடர்ந்து உரிய பதில் அறிக்கை தாக்கல் செய்து முறையான நடவடிக்கை எடுப்பதாகக் கூறி வந்தது. இந்நிலையில், இந்த வழக்கு மீண்டும் நேற்று (ஜூன் 20) விசாரணைக்கு வந்தது.
அரசு தரப்பில், மதுரை, கோவை, திருவள்ளூர், வேலூர், தஞ்சை, ஈரோடு மற்றும் திண்டுக்கல் ஆகிய 7 இடங்களில் இன்னும் 6 மாதங்களில் குழந்தைக் கடத்தல் தடுப்புப் பிரிவு காவல் நிலையமாக விரிவுபடுத்தப்படும் எனவும்; இதற்குரிய அரசாணை வெளியிடப்பட்டுள்ளது எனவும் தெரிவிக்கப்பட்டது.
இதையும் படிங்க:கல்வி நிறுவனங்களில் 10% இட ஒதுக்கீடு அமல்படுத்தப்பட்டுள்ளதா? - உயர்நீதிமன்றம் கேள்வி
இதனைத் தொடர்ந்து, கடந்த 2020 முதல் 2022 வரை சிறுவர் சிறுமிகள் காணாமல் போன வழக்கில் மதுரை மற்றும் கோவையில் மட்டும் 26 சிறுவர்கள், 39 சிறுமிகளை கண்டறிய வேண்டியுள்ளது எனவும்; மற்ற மாவட்டங்களில் இருந்து 53 சிறுவர்களையும், 166 சிறுமிகளையும் கண்டறிய வேண்டியுள்ளது எனவும் கூறப்பட்டது.
இதையடுத்து நீதிபதிகள் பிறப்பித்த உத்தரவில், விசாரணை நடத்தும் அதிகாரத்துடன் இந்த 7 இடங்களில் காவல் நிலையம் விரிவுபடுத்தும் அரசின் நடவடிக்கையை வரவேற்கிறோம் எனவும்; இந்த காவல் நிலையம் விரிவுபடுத்தும் பணியை 3 மாதத்திற்குள் அமல்படுத்த வேண்டும் என்றும்;
கடந்த 6 மாதங்களில் நிலுவையில் உள்ள குழந்தைக் கடத்தல் வழக்குகளை விரைந்து விசாரிக்க வேண்டும் மற்றும் இது தொடர்பான அறிக்கையை விரைவில் தாக்கல் செய்ய வேண்டும் என உத்தரவிட்டு விசாரணையை ஆகஸ்ட் 3ஆம் தேதிக்கு ஒத்திவைத்தனர்.
குழந்தைத் தடுப்புப் பிரிவு காவல் நிலையம் அமைக்கும் அரசின் நடவடிக்கைக்கு உயர் நீதிமன்ற மதுரைக் கிளை வரவேற்பு அளித்துள்ளது. மேலும், விரைந்து விசாரணை செய்து உரிய நடவடிக்கை எடுக்கவும் உயர் நீதிமன்ற மதுரைக் கிளை உத்தரவு பிறப்பித்துள்ளது.
இதையும் படிங்க:Zoho : இஸ்ரேல்-ஆசியா வணிக நிறுவனத்துடன் சோகோ ஒப்பந்தம்.. இஸ்ரேல் மார்க்கெட்டில் கால் பதிக்கும் சோகோ!
