சாத்தான்குளம் விவகாரம்: ஜாமீன் கோரி இரு காவலர்கள் மனு தாக்கல்

மதுரை: சாத்தான்குளம் தந்தை-மகன் உயிரிழந்த விவகாரத்தில் சிறையிலிருக்கும் காவலர்கள் இருவர் தங்களுக்கு பிணை வழங்கக்கோரி உயர் நீதிமன்ற மதுரை கிளையில் மனு தாக்கல் செய்துள்ளனர்.

நெல்லை மாவட்டத்தைச் சேர்ந்த தாமஸ் பிரான்சிஸ், முத்துராஜ் ஆகியோர் உயர் நீதிமன்ற மதுரை கிளையில் தாக்கல் செய்த மனுவில், " சாத்தான்குளத்தில் தந்தை ஜெயராஜ், மகன் பெனிக்ஸ் உயிரிழந்த விவகாரம் தொடர்பாக ஜூலை 1ஆம் தேதி கைது செய்யப்பட்டு தற்போது வரை சிறையில் இருக்கிறோம்.

உயர் நீதிமன்ற மதுரை கிளையின் உத்தரவின்படி, சிபிசிஐடி காவல் துறையினர் வழக்கை விசாரித்த நிலையில் தற்போது சிபிஐ காவல் துறையினர் விசாரித்து வருகின்றனர். வழக்கு தொடர்பான ஆவணங்களை முன்னதாகவே தடய அறிவியல் துறை அலுவலர்கள் சேகரித்துவிட்ட நிலையில் விசாரணையும் முடிவடைந்துள்ளது.

நீதிமன்றம் தற்போது பிணை வழங்குமாயின் தாங்கள் தலைமறைவாக மாட்டோம். நீதிமன்றம் கட்டுப்பாடுகளுக்கு உட்படுவோம். ஆகவே, இந்த வழக்கில் தங்களுக்கு பிணை வழங்கி உத்தரவிட வேண்டும்" எனக் குறிப்பிட்டுள்ளனர்.

இந்த மனு நாளை (ஆக.21) நீதிபதி பாரதிதாசன் முன்பாக விசாரணைக்கு வர உள்ளது.