மதுரை: நாடு முழுவதும் இன்று (பிப்.18) மகா சிவராத்திரி அனைத்து சிவன் கோயில்களிலும் கோலாகலமாக கொண்டாடப்பட்டு வருகிறது. அந்த வகையில் கோயம்புத்தூர் மாவட்டத்தில் உள்ள ஈஷா யோகா மையத்திலும் இன்று மகா சிவராத்திரி விழா கொண்டாடப்பட உள்ளது. இதற்காக குடியரசுத் தலைவர் திரெளபதி முர்மு தமிழ்நாட்டுக்கு வருகை தர உள்ளதாக திட்டமிட்டு இருந்தார்.
இந்த திட்டத்தின்படி, இன்று காலை 11.30 மணிக்கு மேல் டெல்லியில் இருந்து தனி விமானம் மூலம் மதுரை விமான நிலையத்துக்கு வந்தடைவார் என்றும், அங்கிருந்து பிரசித்தி பெற்ற மதுரை மீனாட்சி அம்மன் கோயிலில் சாமி தரிசனம் செய்ய உள்ளார் என்றும் தெரிவிக்கப்பட்டது. அங்கு நிகழ உள்ள அன்னதான விழாவில் கலந்து கொள்ளும் குடியரசுத் தலைவர், பின்னர் அங்கிருந்து புறப்பட்டு மதுரை விமான நிலையம் வந்தடைகிறார்.
இதனையடுத்து கோவை விமான நிலையம் சென்றடையும் திரெளபதி முர்மு, அங்கிருந்து கோவை ஈஷா யோகா மையத்துக்கு செல்கிறார். அங்கு நடைபெற உள்ள மகா சிவராத்திரி விழாவில் குடியரசுத் தலைவர் கலந்து கொள்கிறார். பின்னர் நாளை (பிப்.19) கோவையில் இருந்து டெல்லிக்கு புறப்பட்டுச் செல்கிறார். இந்த நிலையில், தற்போது டெல்லியில் இருந்து தனி விமானம் மூலம் மதுரை விமான நிலையத்துக்கு குடியரசுத் தலைவர் திரெளபதி முர்மு வந்ததார்.
அவரை தமிழ்நாடு ஆளுநர் ஆர்.என்.ரவி மற்றும் அமைச்சர் மனோ தங்கராஜ் ஆகியோர் வரவேற்றனர். தொடர்ந்து அவர் சாலை மார்க்கமாக மதுரை மீனாட்சி அம்மன் கோயிலுக்கு வந்தடைந்தார். பின்னர் அங்கு மீனாட்சி அம்மனை தரிசனம் செய்த திரெளபதின் முர்மு அங்கிருந்து புறப்பட்டுச் சென்றார்.
இதனிடையே குடியரசுத் தலைவர் திரெளபதி முர்முவின் மதுரை பயணத்தை ஒட்டி, மதுரை மாநகர் முழுவதும் ஐந்தடுக்கு போலீஸ் பாதுகாப்பு போடப்பட்டுள்ளது. மேலும் மீனாட்சி அம்மன் கோயிலுக்குள் பக்தர்களுக்கு சில கட்டுப்பாடுகள் விதிக்கப்பட்டுள்ளது. அதேநேரம் மதுரை மாநகரில் சில போக்குவரத்து மாற்றங்களும் மேற்கொள்ளப்பட்டுள்ளது.
இதையும் படிங்க: திரெளபதி முர்மு வருகையை ஒட்டி மதுரையில் ஐந்தடுக்கு பாதுகாப்பு!
