மதுரை: ஒன்றரை மாத குழந்தைக்கு தடுப்பூசி போடப்பட்டதைத் தொடர்ந்து மருத்துவர், செவிலியரின் அலட்சியத்தால் குழந்தையின் உடல்நலம் பாதிக்கப்பட்டுள்ளது. அதனைத் தொடர்ந்து பாதிக்கப்பட்ட குழந்தையின் தாய் மதுரையைச் சேர்ந்த சிந்துஜா என்பவர் உயர் நீதிமன்ற மதுரைக் கிளையில் பொதுநல மனு தாக்கல் செய்திருந்தார்.
அதில், ''எனக்கு குழந்தை பிறந்து 45 நாட்கள் நிறைவடைந்ததைத் தொடர்ந்து, தடுப்பூசி செலுத்துவதற்காக மருத்துவரின் அறிவுறுத்தலின்படி அருகில் இருக்கும் அங்கன்வாடிக்கு தடுப்பூசி செலுத்தச் சென்றேன். அப்போது அங்கு பணியாற்றிய செவிலியர் குழந்தைக்கு தடுப்பூசி செலுத்தி, ஒரு மருந்தினை கொடுத்து, 6 மணி நேரத்திற்கு ஒருமுறை 3 ML அளவு மருந்து வழங்க வேண்டும் எனத் தெரிவித்தார்.
செவிலியரின் அறிவுறுத்தலின்படி எனது குழந்தைக்கு மருந்தினை வழங்கினேன். ஆனால், மருந்து அளித்த பின்னர் எனது குழந்தையின் உடல்நிலை தீவிரமாக பாதிக்கப்பட்டது. இது தொடர்பாக அரசு மருத்துவரையும், செவிலியரையும் அணுகி கேட்ட பொழுது முறையாக பதில் அளிக்காமல் அலட்சியமாக இருந்தனர்.
பின்னர் எனது குழந்தையை தனியார் மருத்துவமனையில் அனுமதித்து சிகிச்சை அளித்த பொழுது, தனியார் மருத்துவமனை மருத்துவர்கள் குழந்தைக்கு பாராசிட்டாமல் மருந்தினை அதிகப்படியாக வழங்கியதாலேயே இந்த பிரச்னை ஏற்பட்டுள்ளது எனத் தெரிவித்தனர். மேலும் எனது குழந்தை தீவிர சிகிச்சைப் பிரிவில் அனுமதிக்கப்பட்டு சிகிச்சை வழங்கப்பட்டது.
அரசு மருத்துவர்கள் மற்றும் செவிலியர்களின் அலட்சியத்தின் காரணமாகவே, எனது குழந்தை உடல்நிலை மோசமான நிலையில் பாதிக்கப்பட்டது. எனவே, அலட்சியப்போக்கில் செயல்பட்ட அவர்கள் மீது உரிய நடவடிக்கை எடுக்கக்கோரி, அதிகாரிகளிடம் மனு அளித்தும் தற்போது வரை எந்தவித நடவடிக்கையும் எடுக்கப்படவில்லை.
மேலும் தமிழகம் முழுவதிலும் அரசு மருத்துவமனை மற்றும் ஆரம்ப சுகாதார நிலையங்களில் சிகிச்சை பெறுபவர்களுக்கு சிகிச்சைக்கு மருந்து, மாத்திரை குறித்த மருத்துவச் சீட்டு வழங்கப்படுவதில்லை. இதனாலேயே தமிழகம் முழுவதிலும் பல்வேறு குழந்தைகள் இறப்பதாக செய்திகள் வெளியே வருகிறது.
எனவே, மருத்துவரின் அலட்சியப் போக்கால் பாதிக்கப்பட்ட எனது குழந்தைக்கு 5 லட்சம் ரூபாய் இழப்பீடு வழங்க வேண்டும். அதேபோல் தமிழகத்தில் உள்ள அனைத்து அரசு மருத்துவமனை மற்றும் ஆரம்ப சுகாதார நிலையங்களில் சிகிச்சைப் பெற வருபவர்களுக்கு முறையாக மருந்து, மாத்திரை குறித்த மருத்துவச் சீட்டு வழங்க உத்தரவிட வேண்டும்'' எனவும் மனுவில் குறிப்பிட்டிருந்தார்.
இந்த மனு நீதிபதிகள் எஸ். எஸ். சுந்தர் மற்றும் பரத சக்கரவர்த்தி அமர்வு முன்பாக விசாரணைக்கு வந்தது.
விசாரணையின்போது குழந்தைக்குத் தடுப்பூசி போட்டபின், பாராசிட்டாமல் மருந்தை அதிக அளவு செவிலியர் கொடுக்கச்சொல்லி உள்ளார். இதனால் குழந்தை உயிருக்கு ஆபத்து ஏற்பட்டு தனியார் மருத்துவமனையில் சிகிச்சை செய்யப்பட்டு உள்ளது.
எனவே, சிகிச்சைக்குப் பின் அரசு மருத்துவமனைகளில் மருந்து மாத்திரை குறித்த மருத்துவச் சீட்டு வழங்க உத்தரவிட வேண்டும் என மனுதாரர் தரப்பில் மூத்த வழக்கறிஞர் வாதிட்டார். இதனைத் தொடர்ந்து மனுதாரரின் கோரிக்கை குறித்து மருத்துவம் மற்றும் மக்கள் நல்வாழ்வு துறைச் செயலர், சிவகங்கை மாவட்ட ஆட்சியர் உள்ளிட்ட அதிகாரிகள் பதில் மனு தாக்கல் செய்ய உத்தரவிட்டு வழக்கு விசாரணையை ஒத்தி வைத்தனர்.
இதையும் படிங்க: அமலாக்கத்துறை இயக்குனர் பணி நீடிப்பு சட்டவிரோதம்... மத்திய அரசுக்கு உச்ச நீதிமன்றம் கிடுக்குபிடி!
