மதுரையைச் சேர்ந்த சோம்நாத், நேயா, ஸ்ரீலயா உள்ளிட்டோர் உயர் நீதிமன்ற மதுரைக்கிளையில் மனு ஒன்றை தாக்கல் செய்தனர். அதில், "தமிழ்நாட்டில் 23 அரசு மருத்துவக் கல்லூரிகள் உள்ளன. இதில் 85 விழுக்காடு இடங்கள் மாநில மாணவர்களுக்கும், 15 விழுக்காடு இடங்கள் பிற மாநில மாணவர்களுக்கும் ஒதுக்கப்பட்டுள்ளன. அரசு மருத்துவக் கல்லூரிகளில் 2,744 இடங்கள் தமிழ்நாடு மாணவர்களுக்கு ஒதுக்கப்பட்டுள்ளன.
இந்த ஆண்டு கலந்தாய்வில் 126 வெளி மாநில மாணவர்கள் பங்கேற்றுள்ளனர். எனவே, தமிழ்நாடு மருத்துவக் கல்வி இயக்குநரகத்தின் செயலர் 2019-2020 ஆம் ஆண்டிற்கான மருத்துவ மாணவர் சேர்க்கைக்கு நடைபெற்று வரும் கலந்தாய்வை ரத்து செய்து அறிவிக்க வேண்டும். மேலும் தமிழ்நாடு இளங்கலை மருத்துவக் கல்லூரி மாணவர் சேர்க்கை கலந்தாய்வு பட்டியலில் வெளி மாநில மாணவர்களை நீக்கவும், புதிதாக மருத்துவ மாணவர் சேர்க்கைக்கான கலந்தாய்வு பட்டியலை வெளியிட்டு அதன் அடிப்படையில் மருத்துவ கலந்தாய்வு நடத்தவும் உத்தரவிட வேண்டும்" என கோரியிருந்தனர்.
இந்நிலையில் இந்த வழக்கு இன்று நீதிபதி சுரேஷ்குமார் முன்னிலையில் விசாரணைக்கு வந்தது. அப்போது முறையாக பரிசீலிக்கப்பட்ட பிறகே, கலந்தாய்விற்கான அழைப்பு விடுக்கப்பட்டதாக அரசுத்தரப்பில் தெரிவிக்கப்பட்டது.
இதையடுத்து நீதிபதி, ”அது குறித்த விபரங்களை அறிய நீதிமன்றம் விரும்புகிறது. அதனடிப்படையிலேயே 126 பேரும் எதிர்மனுதாரராக சேர்க்கப்பட்டனர். அவர்களில் பலர் வெளிமாநிலங்களில் நிரந்தரமாக குடியேறியவர்களாக உள்ளனர். அவர்களுக்கு எந்த அடிப்படையில் தமிழ்நாட்டில் இருப்பிட சான்று வழங்கப்பட்டது? என கேள்வி எழுப்பினார்.
மேலும் தமிழ்நாடு அரசு, தமிழ்நாடு மருத்துவ மாணவர் சேர்க்கைக்கான கலந்தாய்வில் பங்கேற்றதாக கூறப்படும் வெளிமாநிலத்தவர் 126 பேரும் பதில் மனு தாக்கல் செய்ய உத்தரவிட்டு வழக்கை 2 வாரங்களுக்கு ஒத்திவைத்தார்.
