"இந்திய ஆட்சிப் பணியில் தேர்வாகி மக்கள் பணியாற்றுவதே எனது கனவாக இருந்தது. ஆனாலும் அதில் 3 முறை தோல்வியைச் சந்திக்க நேரிட்டது. இருந்தபோதும் அது வேறொரு வடிவில் உலகத்தில் மிகவும் பின்தங்கிய ஆப்பிரிக்க மக்களுக்கு பணியாற்றுவதாக எனது பேராசிரியர் பணி அமைந்துவிட்டதை நான் பெருமையாகவே கருதுகிறேன். இங்கு வாழும் ஆப்பிரிக்க மக்களின் பாசத்திற்கும் பரிவுக்கும் முன்னால் எனக்கு இது பெரிய சாதனையாகவே தெரியவில்லை" என நெகிழ்கிறார் பேராசிரியர் கண்ணன் அம்பலம்.
மதுரை மாவட்டம் பொந்துகம்பட்டியைச் சேர்ந்த இவர், ஆப்பிரிக்க நாடான எத்தியோப்பியாவில் மக்களை ஒருங்கிணைத்து நீர் மேலாண்மையில் சாதனை புரிந்து வருகிறார். மதுரை தியாகராஜர் கல்லூரியில் வேதியியல் பயின்று பின்னர் சென்னை கிறித்தவக் கல்லூரியிலும், டெல்லி ஜவஹர்லால் நேரு பல்கலைக்கழகத்திலும் பயின்றவர். இந்திய ஆட்சிப் பணிக் கனவைக் கொண்டே வளர்ந்தாலும், அது கைகூடவில்லை கண்ணனுக்கு. மக்கள் பணிதானே எந்த வடிவத்தில் இருந்தால் என்ன என்ற விடா முயற்சி அவரை ஆப்பிரிக்காவிலுள்ள எத்தியோப்பிய நாட்டின் வொல்லேகா பல்கலைக் கழகத்தில் பேராசிரியராக கொண்டு நிறுத்தியது.
எங்கோ ஒரு ஆப்பிரிக்க நாட்டின் கிராமத்தில் உள்ளூர் மக்களின் தாகம் தணிக்கப் பணி செய்யும் இந்தத் தமிழர், மதுரை மாவட்டத்திலுள்ள குக்கிராமத்தைச் சேர்ந்தவர் என்றாலும், இன்று ஆப்பிரிக்க மக்களின் மனங்களை வென்ற மகத்தான மனிதராய்த் திகழ்கிறார். எப்படி வாழ வேண்டும் என்பதைவிட, வாழ்கின்ற காலத்தில் தன்னைச் சுற்றியுள்ளவர்களுக்கு எப்படி பயனுள்ள வகையில் வாழ வேண்டும் என்பதற்கு பேராசிரியர் கண்ணன் அம்பலம் போன்றவர்களே நல்ல முன்னுதாரணம்.
இதையும் படிங்க: 'நிற்க அதற்கு தக' - குறளாய் எதிரொலிக்கும் நேத்ராவின் குரல்
