தென்காசி மாவட்டம் வி.கே. புதூர் அருகே உள்ள எரட்டிகுளம் பகுதியைச் சேர்ந்த நாகராஜன் என்பவர் உயர் நீதிமன்ற மதுரைக் கிளையில் மனு ஒன்றை தாக்கல் செய்திருந்தார்.
அதில்," தமிழ்நாட்டில் உள்ள குளங்கள், கண்மாய்கள், ஏரிகள் உள்ளிட்ட நீர்நிலைகளில், தேங்கும் நீரை கொண்டுதான் அந்தந்த பகுதிகளில் விவசாயம் நடைபெறுகிறது. நிலத்தடி நீர் மட்டம் உயர்கிறது. இந்நிலையில், குளங்கள், கண்மாய்கள், ஏரிகள் உள்ளிட்ட நீர்நிலைகளில், தமிழ்நாடு அரசால் தடை செய்யப்பட்ட ஆப்பிரிக்க கெளுத்தி மீன் போன்ற மீன்கள் தென்காசி மாவட்டம் எரட்டிகுளம் கிராமத்தில் உள்ள கண்மாய்களில் வளர்க்கப்படுகின்றன.
இவை நம் பாரம்பரிய மீன்களை வேட்டையாடிவிடும். இவ்வகை மீன்கள் அதிக அளவு நீரை பயன்படுத்துவதோடு, அதிகளவில் இனப்பெருக்கம் செய்து கொண்டே இருக்கும். இதனை மனிதர்கள் உட்கொண்டால் அவர்களுக்கு பல விதமான உடல் நல குறைபாடுகளும், பக்க விளைவுகளும் ஏற்படும். எனவே இந்த வகை மீன்களை மாநில அரசின் கட்டுப்பாட்டில் உள்ள நீர்நிலைகள், தனியார் வளர்க்க தடை விதிக்கப்பட்டுள்ளது .
ஆனால் இது போன்ற தடை செய்யப்பட்ட மீன்களை கண்மாய், குளங்களில், மீன் குத்தகை ஏலம் எடுத்து வளர்க்கின்றனர். விவசாய பயன்பாட்டிற்கான நீரையும் உறிஞ்சி பயன்படுத்துகின்றனர். இதனால் விவசாயத்திற்கு தண்ணீர் கிடைக்காமல் விவசாயம் பெருமளவு பாதிக்கப்படுகிறது.
எனவே தமிழ்நாட்டில் உள்ள ஏரி , குளம் , கண்மாய்களில் மீன்களை வளர்க்க ஏலம் விடும்போது தடைசெய்யப்பட்ட ஆப்பிரிக்கா கெளுத்தி மீன்,தெளி மீன், தெளி விரால், பொய் மீன், பூ விறால் போன்ற மீன்களை வளர்க்க தடை விதிக்க வேண்டும். இதை பொதுப்பணித்துறை, மீன் வளத்துறையினர் கண்காணிக்க உத்தரவிட வேண்டும்" என கூறியிருந்தார்.
இந்த மனுவை விசாரித்த நீதிபதிகள் பி.என்.பிரகாஷ், புகழேந்தி அமர்வு, இதனை பொதுநல வழக்காக தாக்கல் செய்ய இயலாது எனக் கூறி வழக்கை தள்ளுபடி செய்து உத்தரவிட்டனர்.
