மதுரை: நீதிமன்ற உத்தரவை முறையாக நிறைவேற்றாத மாவட்ட ஆட்சியர் மீது நீதிமன்ற அவமதிப்பு நடவடிக்கை எடுக்கக்கோரி அழகப்பன் என்பவர் உயர் நீதிமன்ற மதுரைக் கிளையில் மனு தாக்கல் செய்திருந்தார். அதில் "சிவகங்கை மாவட்டம், காரைக்குடி தாலுகா, அமராவதி புதூர் கிராமத்தில் தனது விவசாய நிலங்களில் உள்ள ஆக்கிரமிப்பினை அகற்றக்கோரி 2019ஆம் ஆண்டு உயர் நீதிமன்றத்தில் வழக்குத் தொடர்ந்திருந்தேன்.
அந்த வழக்கினை விசாரித்த நீதிபதிகள் சட்டத்திற்கு உட்பட்டு வருவாய் ஆவணங்களின் அடிப்படையில் ஆக்கிரமிப்புகளை உரிய காலத்திற்குள் அகற்ற உத்தரவிட்டிருந்தனர். நீதிமன்றம் வழங்கிய அவகாசம் முடிந்தும் ஆக்கிரமிப்புகள் அகற்ற எந்தவித நடவடிக்கையும் எடுக்கப்படவில்லை” எனக் குறிப்பிட்டுள்ளார்.
எனவே, ஆக்கிரமிப்புகளை அகற்ற எந்த நடவடிக்கையும் எடுக்காத மாவட்ட ஆட்சியர் அதிகாரிகளின் மீது நீதிமன்ற அவமதிப்பு நடவடிக்கை எடுக்கக்கோரி உயர் நீதிமன்ற மதுரைக் கிளையில் மனுவினைத் தாக்கல் செய்திருந்தார். இந்த வழக்கு நீதிபதி ஆர். சுப்பிரமணியன் மற்றும் விக்டோரியா கௌரி அமர்வு முன்பாக விசாரணைக்கு வந்தது.
சிவகங்கை மாவட்ட ஆட்சியர் மதுசூதனன் ரெட்டி நீதிமன்றத்தில் நேரில் ஆஜராகினார். அப்போது, நீதிபதிகள் மாவட்ட ஆட்சியரிடம், ’ஆக்கிரமிப்புகளை அகற்றக்கோரி நீதிமன்றம் உத்தரவிட்டும் அது தொடர்பாக ஏன் எந்த நடவடிக்கையும் நீங்கள் எடுக்கவில்லை?’ என கேள்வி எழுப்பினர்.
மேலும் நீதிமன்ற உத்தரவை நிறைவேற்றுவதில் மாவட்ட ஆட்சியர், அதிகாரிகள் அலட்சியப்போக்குடன் செயல்படுகின்றனர். பல்வேறு வழக்குகளிலும் இதுபோன்ற நிலையே நீடிக்கின்றன. இதனால் கடந்த 100 நாட்களில் 600க்கும் மேற்பட்ட நீதிமன்ற அவமதிப்பு வழக்குகள் பதிவு செய்யப்பட்டுள்ளன என வேதனைத் தெரிவித்தனர்.
மேலும், ’’நீதிமன்ற உத்தரவை குறிப்பிட்ட காலத்திற்குள் நிறைவேற்ற முடியவில்லை என்றால் சட்டத்தின் அடிப்படையில் கூடுதல் கால அவகாசம் கேட்டு, நீதிமன்றத்தில் மனு தாக்கல் செய்யலாம்; நீதிமன்றம் கால அவகாசம் வழங்கத் தயாராக உள்ளது. ஆனால், அவ்வாறாக ஏன் எந்தவித மனுவும் தாக்கல் செய்வதில்லை. இத்தகைய செயல்கள் ஆக்கிரமிப்பாளர்களை அதிகாரிகள் ஊக்குவிக்கும் விதமாகவே அமைகிறது.
மேலும், ஒவ்வொரு தாசில்தார் அலுவலகங்களில் பட்டா மாறுதல் செய்வதற்கு லஞ்சம் பெற்றுக் கொண்டே அதிகாரிகள் பட்டா மாறுதல் செய்கின்றனர். இதற்காக தனி புரோக்கர்கள் நியமனம் செய்யப்பட்டுள்ளனர்’’ என வேதனைத் தெரிவித்தார். லஞ்சம் பெறும் அதிகாரிகள் மீது மாவட்ட ஆட்சியர்கள் உரிய நடவடிக்கை எடுக்க வேண்டும் எனவும் தெரிவித்தார்.
''தொடர்ந்து ஆக்கிரமிப்புகளை அகற்றுவது மற்றும் நீதிமன்ற உத்தரவை சட்டத்தின் அடிப்படையில் எப்படி பின்பற்ற வேண்டும் என அனைத்து தாசில்தாருக்கும் மாவட்ட ஆட்சியர் அறிவுறுத்த வேண்டும். அப்படியும் முறையாக நடவடிக்கை எடுக்காத தாசில்தார் மீது மாவட்ட ஆட்சியர் உரிய நடவடிக்கை எடுக்கப்பட வேண்டும்'' என கருத்து தெரிவித்தார்.
தொடர்ந்து மாவட்ட ஆட்சியர் தரப்பில் சம்பந்தப்பட்ட மனுதாரரின் கோரிக்கை தொடர்பாக உரிய நடவடிக்கை எடுக்கப்பட்டு, ஆக்கிரமிப்புகள் அகற்றப்பட்டு, வேலிகள் அமைக்கப்பட்டுவிட்டன எனத் தெரிவிக்கப்பட்டது. இதனைத்தொடர்ந்து நீதிபதி பிறப்பித்த உத்தரவில் ஆக்கிரமிப்பு அகற்றப்பட்டுவிட்டது என மாவட்ட ஆட்சியர் தெரிவித்த அறிக்கையைப் பதிவு செய்து கொண்டு நீதிமன்றம் அவமதிப்பு வழக்கினை முடித்து வைத்தார். மனுதாரர் மேலும் கோரிக்கை இருக்கும்பட்சத்தில் சம்பந்தப்பட்ட உரிமையியல் நீதிமன்றத்தில் வழக்குத் தொடர்ந்து கொள்ளலாம் எனத் தெரிவித்தார்.
இதையும் படிங்க: மெரினாவில் பேனா நினைவுச்சின்னத்துக்கு அனுமதி கிடைக்குமா?: இன்று இறுதி முடிவு?!
