மதுரையில் சர்வதேச சதுரங்கப்போட்டி - 23 நாடுகள் பங்கேற்பு!

மதுரை: மதுரையில் நடைபெற்றுவரும் சர்வதேச அளவிலான சதுரங்கப்போட்டியில் இந்தியா உட்பட 23 நாடுகளைச் சேர்ந்த வீரர்கள் பங்கேற்றுள்ளனர்.

மதுரையில் சர்வதேச அளவிலான சதுரங்கப்போட்டி நேற்று தொடங்கியது. இதில், இந்தியா உட்பட 23 நாடுகளிலிருந்து வீரர்கள் பங்கேற்றுள்ளனர். இந்த மாதம் 18ஆம் தேதி வரை இந்தப் போட்டிகள் நடைபெறவுள்ளன. மதுரை மாட்டுத்தாவணி அருகேயுள்ள ஒரு தனியார் விடுதியில் ஆனந்தி செஸ் அகாதெமி, தமிழ்நாடு மாநில செஸ் அசோசியேஷன் ஆகியவை இணைந்து சர்வதேச அளவிலான சதுரங்கப் போட்டியை நடத்துகின்றன.

இது குறித்து செய்தியாளர்களுக்கு பேட்டியளித்த போட்டியின் இயக்குநர் பிரகதிஷ், "இந்தப் போட்டியில் வெற்றிபெறுபவர்களின் மொத்தப் பரிசின் மதிப்பு ரூ.32 லட்சமாகும். போட்டியாளர்களுக்கு உணவு, தங்குமிடம், போக்குவரத்து உள்பட அனைத்து வசதிகளும் இலவசமாக செய்து தரப்பட்டுள்ளன" என்றார்.