திருச்சி சுப்ரமணியபுரத்தில் பாதிரியார் திதியோன் ஜேக்கப் என்பவர் காப்பகம் நடத்தி வந்தார். இதில், பெற்றோரால் கைவிடப்பட்ட ஏராளமான குழந்தைகள் தங்கி படித்தனர். அதில் தங்கிபடித்த குழந்தைகளை வெளிநாடுகளுக்கு அழைத்துச் சென்று முறைகேடாக வருவாய் ஈட்டுவதாக பாடம் நாராயணன் என்பவர் உயர் நீதிமன்ற மதுரைக் கிளையில் வழக்கு தொடர்ந்தார்.
இந்த விவகாரம் குறித்து சிபிஐ விசாரணை நடத்தவும், காப்பகத்தை மாவட்ட சமூக நலத்துறை ஏற்று நடத்த வேண்டுமெனவும் நீதிமன்றம் உத்தரவிட்டடிருந்தது.
இந்நிலையில் காப்பகத்திலுள்ள பெண் குழந்தைகள் ஒன்பது பேர், உயர் நீதிமன்ற மதுரைக் கிளையில் மனு ஒன்றை தாக்கல் செய்திருந்தனர். அதில், திருச்சி காப்பகத்திலுள்ள எங்களை தஞ்சாவூர் காப்பகத்திற்கு மாற்றி மாவட்ட சமூக நல அலுவலர் உத்தரவிட்டுள்ளார். அந்த உத்தரவுக்கு தடை விதித்து அதனை ரத்து செய்ய வேண்டும் என்று கோரியிருந்தனர்.
இந்த மனு நீதிபதிகள் துரைசாமி, ரவீந்திரன் ஆகியோர் முன் விசாரணைக்கு வந்தது. அரசு தரப்பு வழக்கறிஞர், "மனுதாரர்கள் முறையான அனுமதி பெறாமல் சென்னை சென்றுள்ளனர். அவர்களின் பாதுகாப்பு மற்றும் நலன் கருதியே தஞ்சைக்கு மாற்றப்பட்டனர்” என்றார்.
இதற்கு பதிலளித்து பேசிய மனுதாரர் தரப்பு வழக்கறிஞர், மனுதாரர்கள் வெளியில் செல்வதை காப்பக பதிவேட்டில் பதிவு செய்துள்ளனர் என்றும் உடை உள்ளிட்ட பொருட்களை மொத்தமாக வாங்குவதற்காக சென்னை சென்றார்கள் என்றார்.
இதுகுறித்து அரசுத் தரப்பில் பதில் மனு தாக்கல் செய்ய உத்தரவிட்ட நீதிபதிகள் வழக்கு விசாரணையை ஜனவரி முதல் வாரத்திற்கு ஒத்திவைத்தனர்.
இதையும் படிங்க: 'வைகோ மட்டும் தான் தமிழ்நாட்டின் ஆளுமைமிக்க அரசியல்வாதி' - அமைச்சர் செல்லூர் ராஜூ
