மதுரை: அரசு ராஜாஜி மருத்துவமனை பச்சிளம் குழந்தைகள் சிகிச்சைப் பிரிவில் பிறந்து 2 நாட்களே ஆன பெண் குழந்தையை மார்ச் 25-ஆம் தேதி 60 வயது மதிக்கத்தக்க பெண் ஒருவர் சிகிச்சைக்கு கொண்டு வந்தார். அப்போது, செவிலியர்கள் குழந்தைக்கும் பெண்ணுக்கும் வயது வேறுபாடு அதிகமாக இருந்ததால், சந்தேகத்தின் பேரில் குழந்தையின் தாய் யார் என கேட்டனர்.
அதற்கு அவர் முன்னுக்குப் பின் முரணாகப் பேசியுள்ளார். திருடிய குழந்தையாக இருக்கலாம் என்று போலீசாருக்கு தகவல் தெரிவிக்கப்பட்டது. விரைந்து வந்த மருத்துவமனை காவல்நிலைய போலீசார் அந்தப் பெண்ணை விசாரித்தனர். அப்போது, அவர் உசிலம்பட்டி - கக்காரன்பட்டி- ஒத்தவீடு பகுதியைச்சேர்ந்த பாண்டியம்மாள் எனத் தெரியவந்தது. குழந்தையை அவரது தாயே விற்கக் கொடுத்ததாகவும், குழந்தைக்கு உடல்நலம் சரியில்லாததால் சிகிச்சை அளித்துவிட்டு விற்க முயற்சி செய்யலாம் என நினைத்ததாகவும் தெரிவித்தார்.
இதனால் சந்தேகமடைந்த போலீசார் பாண்டியம்மாளை மேலும் விசாரித்தபோது அதிர்ச்சிகரமான தகவல்கள் வெளிவந்தன. பாண்டியம்மாளுக்கு மூன்று பெண் பிள்ளைகள். அவரது கணவர் இறந்துவிட்டதால் குடும்பம் வறுமை நிலையில் இருந்துள்ளது. இதனால் 20 வயதான மூன்றாவது பெண்ணை திருப்பூருக்கு வேலைக்காக அனுப்பியுள்ளார்.
திருப்பூருக்கு வேலைக்குச் சென்றவர் ஒருவருடன் பழகிவந்த நிலையில் கருவுற்றுள்ளார். இந்த விஷயத்தை அவர் வீட்டில் கூறாமல் இருந்துவந்தநிலையில், வீட்டில் அவருக்கு வரன் பார்த்து திருமணத்திற்கு நிச்சயித்துள்ளனர். இந்தநிலையில் மகள் கருவுற்றிருப்பது பாண்டியம்மாளுக்குத் தெரியவந்துள்ளது. இதனால் அதிர்ச்சியடைந்தவர் செய்வதறியாது திகைத்துள்ளார்.
இந்நிலையில் குழந்தை பிறப்பதற்கு தேதி நெருங்கிய நிலையில் அவர்களுக்கு பழக்கமான செவிலியரான அன்னம்பார்பட்டி மாலதி மூலம் வீட்டில் வைத்து பிரசவம் பார்த்துள்ளனர். பிறந்த பெண் குழந்தையை விற்றால் பணம் கிடைக்கும் என்று மாலதி கூறியதன் பேரில், குழந்தையை விற்பனை செய்ய முடிவு செய்துள்ளனர்.
அப்போது குழந்தைக்கு உடல்நிலை சரியில்லாததால் மருத்துவமனைக்கு கொண்டு வந்தபோது சிக்கியுள்ளனர். இதையடுத்து போலீசார் அன்னமார்பட்டி மாலதி, பாண்டியம்மாள் (60), அவரது மகள் அழகுபாண்டியம்மாள் (40), மற்றொரு மகள் பாண்டியம்மாள் (45) ஆகிய 4 பேரை கைது செய்தனர்.
இதுகுறித்து போலீசார் கூறியதாவது, பிறந்து 2 நாட்களே ஆன குழந்தையை மார்ச் 25ஆம் தேதி மாலதி மதுரை ஆனையூருக்கு ஆட்டோவில் வந்து பாண்டியம்மாளிடம் விற்பனை செய்ய கொடுத்துள்ளார். தாய்ப்பால் இல்லாமல் குழந்தை அழுததால் பாண்டியம்மாள் குழந்தைக்குப் புட்டிப் பால் புகட்டியுள்ளார்.
குழந்தைக்கு திடீரென மூச்சுத் திணறல் ஏற்பட்டதால் மருத்துவமனைக்கு சிகிச்சைக்கு வந்தபோது சிக்கினார். இதில் வேறு யாருக்கேனும் தொடர்பு உள்ளதா என விசாரித்து வருகிறோம் என போலீசார் தெரிவித்தனர். மதுரை அரசு மருத்துவமனை டீன் ரத்தினவேலு கூறுகையில், ''குழந்தை ஐசியூ வார்டில் சிகிச்சைப் பெறுகிறது. தற்போது நலமுடன் உள்ளது. மருத்துவமனைக்கு சிகிச்சைக்கு வந்தபோது குழந்தை கடத்தப்பட்டதாகப் பரவும் தகவலில் உண்மையில்லை'' என்றார்.
இதையும் படிங்க: பள்ளி மாணவர்களின் தகவல்கள் திருட்டு: முக்கிய நபருக்கு போலீசார் வலைவீச்சு!
