மதுரை: திருச்சியில் விதிமுறைகளை மீறி கட்டப்பட்ட அடுக்குமாடி குடியிருப்பு கட்டடத்திற்கு ஆதரவாக செயல்பட்ட அரசு மற்றும் மாநகராட்சி அலுவலர்கள் மீது துறைரீதியிலான நடவடிக்கை எடுக்க வேண்டும் என உயர் நீதிமன்ற மதுரைக்கிளை உத்தரவிட்டுள்ளது.
இதுகுறித்து திருச்சி உய்யக்கொண்டான் பகுதியைச்சேர்ந்த சண்முகசுந்தரம், உயர் நீதிமன்ற மதுரைக்கிளையில் தாக்கல் செய்த மனுவில்: "திருச்சி ஸ்ரீரங்கம் தாலுகா, உய்யகொண்டான் திருமலைப் பகுதியில் சுமார் 51 சென்ட் நிலத்தில் 100 வீடுகளை கொண்ட அடுக்குமாடி குடியிருப்பு கட்டப்பட்டுள்ளது. இந்த குடியிருப்பு விதிமுறைகளை மீறி கட்டப்பட்டுள்ளது. சுமார் 54 விழுக்காடு விதிமுறைகளை மீறியுள்ளது. இந்த முறைகேடு குறித்து திருச்சி மாநகராட்சி மற்றும் மாவட்ட அலுவலர்களிடம் நடவடிக்கை எடுக்கும்படி புகார் அளித்தும் அலுவலர்கள் கண்டு கொள்ளவில்லை.
எனவே, விதிமுறைகளை மீறி கட்டப்பட்ட அடுக்குமாடி குடியிருப்பை இடிக்க வேண்டும். இந்த முறைகேட்டை தடுக்கத் தவறிய அலுவலர்கள் மீது துறை ரீதியான நடவடிக்கை எடுக்க உத்தரவிட வேண்டும்” என மனுவில் கூறியிருந்தார்.
இந்த வழக்கு நீதிபதிகள் மகாதேவன், சத்திய நாராயணபிரசாத் அமர்வு முன்பு விசாரணைக்கு வந்தது. நீதிபதிகள் பிறப்பித்த உத்தரவில், 'விதிமுறைகளை மீறி கட்டப்படும் கட்டடங்களை முறைப்படுத்துவது மற்றும் இடிப்பது குறித்து உச்ச நீதிமன்றம் மற்றும் உயர் நீதிமன்றம் பல்வேறு உத்தரவுகளைப் பிறப்பித்துள்ளது. ஆனால், அலுவலர்கள் இதனை முறையாக பின்பற்றுவது இல்லை. ஒரு கட்டடத்தை அங்கீகாரம் இன்றி கட்டலாம். பின்னர் அதில் உள்ள குறைபாடுகளை சரிசெய்து கொள்ளலாம் என்ற எண்ணத்தை அலுவலர்கள் ஊக்குவிக்கக்கூடாது.
அனுமதியின்றி கட்டடம் கட்டினால், அதை இடிக்க அலுவலர்கள் நடவடிக்கை எடுக்க வேண்டும் என்பது சட்டமாகும். கட்டடம் முறையாக கட்டப்பட்டு உள்ளது என்பதை ஆய்வு செய்து, நிறைவுச்சான்றிதழ் பெற்றால்தான் மின்சாரம், நீர், பாதாளச்சாக்கடை இணைப்புகளை வழங்க வேண்டும் என சட்டத்தில் கூறப்பட்டுள்ளது.
நகரத்தில் திட்டமிடப்பட்ட வளர்ச்சியை ஊக்குவிப்பதே இந்தச்சட்டத்தின் நோக்கம். ஆனாலும் சட்ட விதிகளை மீறி கட்டடங்கள் கட்டுவது தடையில்லாமல் நடக்கிறது. விதிகளை மீறி கட்டப்பட்ட கட்டடத்தை இடிக்க வேண்டும் என்று அலுவலர்களுக்கு உச்ச நீதிமன்றம், உயர் நீதிமன்றம் ஏற்கெனவே உத்தரவிட்டுள்ளது. ஆனால்,மேற்காணும் வழிகாட்டுதல்களை இந்த வழக்கில் தொடர்புடைய அலுவலர்கள் பின்பற்றவில்லை.
எனவே, அங்கீகரிக்கப்படாமல் கட்டப்பட்ட அடுக்குமாடி குடியிருப்பைக் கட்டியதற்கு எதிராக நடவடிக்கை எடுக்காத அலுவலர்கள் மீது துறை ரீதியிலான நடவடிக்கையை 2 வாரத்தில் தமிழ்நாடு அரசு எடுக்க வேண்டும். இதுதொடர்பான அறிக்கையை வருகின்ற 10-ம் தேதிக்குள் இந்த நீதிமன்றத்தில் தாக்கல் செய்ய உத்தரவிட்டு', இந்த வழக்கை நீதிபதிகள் ஒத்திவைத்தனர்.
இதையும் படிங்க: ஆறு இடங்கள் நீங்கலாக ஆர்எஸ்எஸ் ஊர்வலத்திற்கு அனுமதி வழங்க காவல்துறைக்கு உத்தரவு
