கிசான் திட்ட முறைகேடு: நீதிமன்றம் சரமாரி கேள்விகள்!

கிசான் திட்ட முறைகேடு தொடர்பாக எத்தனை வழக்குகள் பதிவுசெய்யப்பட்டுள்ளன, எத்தனை நபர்கள் கைதுசெய்யப்பட்டுள்ளனர் உள்ளிட்ட பல்வேறு கேள்விகளை சென்னை உயர் நீதிமன்ற மதுரைக் கிளை கேட்டுள்ளது.

மதுரை: திண்டுக்கல்லைச் சேர்ந்த சிவபெருமாள் என்பவர் உயர் நீதிமன்ற மதுரைக்கிளையில் பொதுநல வழக்கு தாக்கல் செய்திருந்தார். அதில், "நல்லமனார் கோட்டைப் பகுதியில் சுமார் ஆயிரம் விவசாயிகள் வேளாண்மை செய்துவருகின்ற நிலையில் வேடசந்தூர் தாலுகாவின் உதவி வேளாண் அலுவலர் தெய்வேந்திரன் விவசாயிகளுக்கான கிசான் திட்டத்தின்கீழ் விவசாயிகள் அல்லாத தகுதியற்ற பலரைச் சேர்த்து முறைகேடாக வங்கிக் கடன் வழங்கியுள்ளார்.

மேலும் இந்த வங்கிக் கடன் வழங்குவதில் ஆளும் கட்சியின் அரசியல் பிரமுகர்கள் தலையீடும் உள்ளது. அவர்கள் பரிந்துரைத்தால் மட்டுமே முறைகேடாக கடன் வழங்கப்பட்டுவருகிறது. விவசாயிகளுக்கான பிரதமரின் திட்டத்தில் முறைகேடு செய்த வேடசந்தூர் உதவி வேளாண் அலுவலர் மீது உரிய நடவடிக்கை எடுக்க உத்தரவிட வேண்டும்" எனக் கூறியிருந்தார்.

இந்த வழக்கு நீதிபதிகள் கிருபாகரன், புகழேந்தி அமர்வு முன்பாக விசாரணைக்கு வந்தது. அப்போது நீதிபதிகள், "விவசாயிகளுக்காக மத்திய மாநில அரசுகள் வழங்கும் திட்டங்கள் என்ன, அதற்காக எவ்வளவு தொகை வழங்கப்பட்டுள்ளது, எத்தனை விவசாயிகள் இந்தத் திட்டங்களின்கீழ் பயன்பெற்றுள்ளனர், விவசாயிகளுக்காக மானியமாக எவ்வளவு தொகை வழங்கப்பட்டுள்ளது,

விவசாயிகள்தான் பயன்பெறுகிறார்கள் என்பதை உறுதிசெய்ய மத்திய, மாநில அரசுகள் பின்பற்றும் நடைமுறை என்ன, கிசான் திட்ட முறைகேடு தொடர்பாக எத்தனை வழக்குகள் பதிவுசெய்யப்பட்டுள்ளன, எத்தனை பேர் கைதுசெய்யப்பட்டுள்ளனர், நடவடிக்கையின் தற்போதைய நிலை என்ன,

கடந்த 10 ஆண்டுகளில் மத்திய அரசின் விவசாயிகளுக்கான திட்டத்தில் மோசடி செய்ததாக எத்தனை அலுவலர்கள் மீது நடவடிக்கை எடுக்கப்பட்டுள்ளது?" உள்ளிட்ட பல்வேறு கேள்விகளை எழுப்பினர்.

மேலும், மத்திய, மாநில அரசுகளின் வேளாண் துறைச் செயலர்கள், தமிழ்நாடு காவல் துறைத் தலைவர் ஆகியோரை நீதிமன்றம் தானாக முன்வந்து வழக்கில் சேர்ப்பதாக நீதிபதிகள் உத்தரவிட்டனர். தொடர்ந்து, "அனைவருக்கும் உணவு ஊட்டும் விவசாயிகள் சுரண்டப்படுவது ஆரோக்கியமான அடையாளம் இல்லை. நாள் முழுவதும் ஒட்டிய வயிறுடன் உழைக்கும் விவசாயிகள் விளை பொருள்களுக்கு விலை நிர்ணயம் செய்ய இயலாத நிலை உள்ளது.

வேலை ஆள்களுக்கு ஊதியம் என எதையும் கருத்தில் கொள்ளாது குறைந்தபட்ச விலை நிர்ணயம் என்பது வருந்தத்தக்கது" எனக் குறிப்பிட்ட நீதிபதிகள், நீதிமன்றம் கேட்ட கேள்விகளுக்கு மத்திய, மாநில வேளாண் துறைச் செயலர்கள் பதிலளிக்க உத்தரவிட்டு வழக்கு விசாரணையை அக்டோபர் 15ஆம் தேதிக்கு ஒத்திவைத்தனர்.

இதையும் படிங்க: கிசான் திட்ட முறைகேடு விவகாரம் : அரசின் நடவடிக்கைக்கு இடைக்காலத் தடை