தமிழ்நாட்டின் பல்வேறு பகுதியிலுள்ள பிஎஸ்என்எல் அலுவலகங்களுக்கு ஒப்பந்த அடிப்படை முறையில் பணியாளர்களை அனுப்பிவைத்தற்காகத் தனக்கு வழங்க வேண்டிய பாக்கி பணமான எட்டு கோடியே 76 லட்சம் ரூபாயை வழங்கக்கோரி திருச்சி பாண்டியன் என்பவரும், தனக்கு வழங்க வேண்டிய நான்கு கோடி ரூபாயை கேட்டு பொன்னுசாமி என்பவரும் உயர் நீதிமன்றம் மதுரைக் கிளையில் தனித்தனியே மனு தாக்கல்செய்திருந்தனர்.
இந்த மனுக்களை நீதிபதி கிருஷ்ணன் ராமசாமி விசாரித்தார். அப்போது, வழக்கறிஞர் ராஜகோபால் முன்னிலையாகி, “பிஎஸ்என்எல் நிறுவனத்தினர் பாக்கியைத் தராததால், பணியாளர்களுக்கான சம்பள பாக்கியை இன்னும் வழங்க முடியவில்லை. வருங்கால வைப்புத்தொகைகூட (பி.எஃப்.) செலுத்த முடியாத நிலை உள்ளது” என்றார்.
இதையடுத்து, “மனுதாரருக்கு வழங்க வேண்டிய பணத்தை வழங்குவது தொடர்பான கோரிக்கையை பிஎஸ்என்எல் நிர்வாகம் பரிசீலிக்க வேண்டும். சென்னை உயர் நீதிமன்றம் உத்தரவில் கூறியுள்ள வழிகாட்டுதல்களைப் பின்பற்ற வேண்டும். தொழிலாளர்களின் வருங்கால வைப்புத்தொகை உள்ளிட்ட பங்களிப்பிற்கான பணம் செலுத்த வேண்டியிருந்தால், செலுத்துவதை உறுதிப்படுத்த வேண்டும். ஒட்டுமொத்த நடவடிக்கைகளையும் 12 வாரத்திற்குள் முடிக்க வேண்டும்” என நீதிபதி உத்தரவிட்டுள்ளார்.
இதையும் படிங்க: சர்ச்சைக்குரிய தீர்ப்பு- நீதிபதி புஷ்பா கணேடிவாலா நிரந்தர நீதிபதி பரிந்துரை வாபஸ்!
