நவம்பர் புரட்சியை முன்னிட்டு மதுரையில் நடைபெற்ற செஞ்சட்டைப் பேரணியில் பங்கேற்பதற்காக மார்க்சிஸ்ட் கம்யூனிஸ்ட் கட்சியின் திண்டுக்கல் முன்னாள் சட்டப்பேரவை உறுப்பினர் பாலபாரதி மதுரை வந்திருந்தார்.
அப்போது நமது ஈடிவி பாரத் செய்தி ஊடகத்திற்கு பேட்டியளித்த அவர், "தொழிலாளர்களுக்காக ரஷ்யாவில் நடைபெற்ற நவம்பர் புரட்சி, உலகத்திற்கே பெரும் மாற்றத்தை ஏற்படுத்தியது. இந்தப் புரட்சியின் விளைவாகத்தான் உலகத் தொழிலாளர்கள் அனைவருக்கும் விடிவு காலம் பிறந்தது.
தமிழ்நாட்டில் பாரதியாரிலிருந்து, வ.உ.சி., திருவிக வரை இதனை யுகப்புரட்சியாகவே வர்ணித்தனர். அதன் நூற்றாண்டு விழாவை மார்க்சிஸ்ட் கம்யூனிஸ்ட் கட்சி கொண்டாடுவதில் பெருமை கொள்கிறது. இந்தியாவில் வரலாறு காணாத அளவில் ஒரு கிலோ வெங்காயத்தின் விலை நூறு ரூபாய்க்கு விற்கப்படுகிறது.
இதனை திசை திருப்பவே பாஜக திட்டமிட்டு திருவள்ளுவருக்கு காவி அணிவித்து, ருத்திராட்சக் கொட்டைகள் அணிவித்து பிரச்சனையை பூதாகரமாக்கியுள்ளது. வள்ளுவர் குறித்து இளந்தலைமுறை குழந்தைகளிடத்தில் மாற்றுச் சிந்தனையை வளர்க்கும் நோக்கமும் இதில் அடங்கியுள்ளது. இதனை மார்க்சிஸ்ட் கட்சி வன்மையாகக் கண்டிக்கிறது
தமிழ்நாட்டைப் பொறுத்தவரையில், பாஜகவின் செல்லப்பிள்ளையாக அதிமுகவை அக்கட்சியின் தலைவர்களே மாற்றி வைத்திருக்கிறார்கள். உள்ளாட்சித் தேர்தல் குறித்தெல்லாம் இவர்களுக்கு கவலையில்லை. ஆர்எஸ்எஸ் என்னும் படுகுழிக்குள் அதிமுக வீழ்ந்து தனது அடையாளத்தை இழந்து கொண்டிருக்கிறது" எனக் கடுமையாகச் சாடி பேசினார்.
இதையும் படிங்க: சாலையில் வீணாகச் செல்லும் தண்ணீரை சேமிக்க வேண்டும்!'
