'சாதி ஆதிக்க தேர்தல் படுகொலையே அரக்கோணம் சம்பவம்'

அரக்கோணம் சோகனூர் பகுதியில் நடைபெற்ற இரட்டை படுகொலை சாதி ஆதிக்கம் மனோபாவத்தில் நிகழ்ந்த தேர்தல் படுகொலையாகும் என்று இப்படுகொலை குறித்து ஆய்வு மேற்கொண்ட ’நீதிக்கான சாட்சியம்’ என்ற அமைப்பின் செயல் இயக்குநர் பாண்டியன் தெரிவித்துள்ளார்.

மதுரையில் உள்ள நீதிக்கான சாட்சியம் என்ற அமைப்பின் சார்பாக அரக்கோணம் இரட்டை படுகொலைத் தொடர்பாக கள ஆய்வு மேற்கொள்ளப்பட்டது. அமைப்பின் செயல் இயக்குநர் பாண்டியன் மதுரையில் இன்று (ஏப். 17) செய்தியாளர்களைச் சந்தித்தார். அப்போது பேசிய அவர், "அரக்கோணம் சோகனூர் பகுதியில் நடைபெற்ற பட்டியலின சாதி இளைஞர்கள் படுகொலை, தேர்தலில் விரும்பிய வேட்பாளருக்கு வாக்களித்ததற்கான வன்கொடுமைச் சம்பவமாகும்.

இந்தக் கொலையில் பாமகவின் பங்கு நேரடியாகவே உள்ளது. ஆனாலும், சிவகாமி ஐஏஎஸ் இது குறித்து முரண்பட்ட தகவலை கூறியிருப்பது ஆச்சரியத்திற்குரியது. பட்டியலின சாதியைச் சார்ந்த அர்ஜுன், சூர்யா படுகொலை திட்டமிட்டு நிகழ்த்தப்பட்ட சாதிய படுகொலை மட்டுமன்றி தேர்தல் முன்விரோதமுமாகும். இந்த வழக்கில், தொடர்புடைய அனைத்து குற்றவாளிகளையும் உடனடியாக கைது செய்ய வேண்டும்.

வன்கொடுமைத் தடுப்புச் சட்டம் 2015 விதிகள் 12 இன் கீழ் சாதி மண் படுகொலை செய்யப்பட்ட இரண்டு இளைஞர்களின் குடும்பத்தினருக்கும் தலா ரூபாய் ஒரு கோடி நிவாரண உதவியும், குடும்பத்தில் ஒருவருக்கு அரசு வேலையும், இரண்டு ஏக்கர் விவசாய நிலமும் உடனடியாக தமிழ்நாடு அரசு வழங்க வேண்டும். மேலும் இந்தத் தாக்குதலில் படுகாயமடைந்த சௌந்தரராஜன், மதன்குமார், வல்லரசு ஆகியோருக்கு ரூபாய் 10 லட்சம் நிவாரணம் வழங்க தமிழ்நாடு அரசு நடவடிக்கை எடுக்க வேண்டும்.

இந்தக் கொலை வழக்கு குறித்து முதல் தகவல் அறிக்கை பதிவுச் செய்யாமல் மிகவும் அலட்சியமாக விசாரணையை கையாண்டு வரும் அரக்கோணம் காவல் துறையிடமிருந்து இவ்வழக்கை மாற்றம் செய்து பாரபட்சமற்ற வகையில் புலன் விசாரணையை மேற்கொள்ள மத்திய புலனாய்வுப் பிரிவுக்கு மாற்ற வேண்டும். தேசிய பட்டியல் சாதி ஆணையம் தாமாக முன்வந்து இரட்டைப் படுகொலை சம்பவத்தை விசாரணை செய்ய வேண்டும்.

அதேபோன்று சென்னை உயர் நீதிமன்றம் இவ்வழக்கை தாமாக முன்வந்து முழுவதுமாக கண்காணிக்க வேண்டும். தமிழ்நாட்டில் தேர்தலையொட்டி பட்டியல் சாதி மக்கள் மீது அதிகரித்து வரும் சாதி வன்கொடுமைத் தாக்குதல்கள், படுகொலைகள் குறித்து தேசிய பட்டியல் சாதி ஆணையம் ஒரு முழுமையான ஆய்வு செய்வதோடு பட்டியல் சாதி மக்கள் பாதுகாப்பாக தேர்தலை எதிர்கொள்ள தேர்தலுக்கு முன்பும் பின்பும் தமிழ்நாடு காவல் துறை, தேர்தல் ஆணையம் கட்டாயம் கடைபிடிக்க வேண்டிய வழிகாட்டு நெறிமுறைகளை தமிழ்நாடு அரசுக்கும் தேர்தல் ஆணையத்திற்கும் வழங்க வேண்டும் என வேண்டுகோள் வைத்தார்.

இதையும் படிங்க: ’அரக்கோணம் விவகாரத்தில் சாதி அரசியலைக் கையில் எடுத்த திருமாவளவன்’ - எல்.முருகன்