மதுரை: மதுரை நாடாளுமன்ற உறுப்பினர் சு.வெங்கடேசன் இன்று (ஜூலை 12) வெளியிட்டுள்ள செய்தி குறிப்பில் கூறியிருப்பதாவது, இந்தியன் வங்கி வெளியிட்டு இருந்த பணி நியமன வழிகாட்டல்களில் கருவுற்ற காலத்தில் மகளிருக்கு பணி நியமனங்கள் மறுக்கப்படுகிற அம்சம் இடம் பெற்று இருந்தது.
"பெண் தேர்வர் மருத்துவப் பரிசோதனையின் போது 12 வாரங்கள் அல்லது அதற்கு மேல் கருவுற்ற காலத்தை கடந்திருப்பது தெரிய வரும் பட்சத்தில், பிரசவத்திற்கு பிந்தைய ஓய்வு காலம் வரையிலும், அவர் பணி நியமனம் பெற தற்காலிகமாக தகுதி அற்றவர் என்று கருதப்படுவார்.
பிரசவம் முடிந்து 6 வாரம் நிறைவு பெற்ற பின்னர், பதிவு செய்யப்பட்ட மருத்துவர் இடமிருந்து உடல் நல தகுதி பெற்று சமர்ப்பிக்கப்பட்டால், அவர் மறு மருத்துவ பரிசோதனைக்கு உள்ளாக்கப்பட்டு உடல் நலத் தகுதி உறுதி செய்யப்பட வேண்டும்" என்ற அந்த வழிகாட்டல் அப்பட்டமான பாலின பாரபட்ச நடைமுறை எனவும், அது கைவிடப்பட வேண்டுமெனவும் இந்தியன் வங்கி தலைவர் சாந்திலால் ஜெயினுக்கு கடந்த ஜூன் 12ஆம் தேதி கடிதம் எழுதியிருந்தேன்.
மீண்டும் கடிதம்
இதற்கு ஜூன் 16ஆம் தேதி அன்று பதில் அளித்த இந்தியன் வங்கியின் நிர்வாக இயக்குநர் அஸ்வினி குமார் "சம்பந்தப்பட்ட பெண் ஊழியர்கள் வேண்டுகோள் விடுத்த அடிப்படையிலேயே பணியில் சேர கால அவகாசம் சிலருக்கு தரப்பட்டது" என்று பதில் அளித்திருந்தார். மேலும், 1987ஆம் ஆண்டு வெளியிடப்பட்ட ஒன்றிய அரசின் பணியாளர் நலன் மற்றும் பயிற்சி துறையின் சுற்றறிக்கை ஒன்றையும் குறிப்பிட்டு இருந்தார்.
எனவே மீண்டும் ஜூன் 21 அன்று இந்தியன் வங்கி தலைவருக்கு ஒரு கடிதத்தை எழுதி இருந்தேன். சம்பந்தப்பட்ட மகளிர் ஊழியர்கள் வேண்டுகோளின் அடிப்படையிலேயே பணி நியமனங்கள் சில நேரங்களில் தள்ளிப் போடப்பட்டுள்ளது என்ற விளக்கத்திற்கும், பணி நியமன வழி காட்டல்களுக்கும் ஒன்றுக்கொன்று பொருந்தாத முரண் இருப்பதை சுட்டிக் காட்டி பணி நியமன வழிகாட்டல்கள் திரும்பப் பெறப்பட வேண்டும் என்று அக்கடிதத்தில் எழுதி இருந்தேன்.
புதிய விதி நீக்கம்
அதற்கு மீண்டும் ஜூலை 4, 2022 அன்று இந்தியன் வங்கி நிர்வாக இயக்குநர் அஸ்வினி குமாரிடம் இருந்து பதில் வந்தது. அதில், "எங்களது முந்தைய கடிதத்தில் இப்பிரச்சினை மறு பரிசீலனை செய்யப்படும் என்று உறுதி அளித்திருந்தோம். அதன்படி பரிசீலனை மேற்கொண்டு, இனி தவறான பொருள் கொள்தல் நிகழ்ந்து விடக் கூடாது என்று அந்த விதியை நீக்கி இருக்கிறோம்.
இதுவரை எந்த மகளிருக்கும் இந்தியன் வங்கியில் பணி நியமனம் மறுக்கப்பட்டதில்லை என்றும் பாலின பாரபட்ச நடைமுறைகளை கடைப்பிடிப்பதில்லை எனவும் தெரிவித்துக் கொள்கிறோம். இத்தோடு இப்பிரச்சினை முடிந்து விட்டதாக எடுத்துக் கொள்ள அனுமதிக்குமாறு உளமாற வேண்டுகிறோம் என கடிதத்தில் குறிப்பிட்டுள்ளார்.
இந்தியன் வங்கியில் எட்டப்பட்டுள்ள தீர்வு பாலின பாரபட்ச நடைமுறைகளுக்கு எதிரான இன்னொரு முன்னோக்கிய நகர்வு" என இந்த அறிக்கையில் சு. வெங்கடேசன் குறிப்பிட்டுள்ளார்.
இதையும் படிங்க: மாரத்தானில் பங்கேற்று ஓடிய மருத்துவத்துறை அமைச்சர்
