தமிழில் வெளியான 'சுந்தரபாண்டியன்', 'தர்மதுரை', 'பூஜை', 'ஜிகர்தண்டா', 'தெறி' போன்ற படங்களில் நடித்தவர் நடிகர் செளந்தர்ராஜா. இவர் தனது பிறந்தநாளை முன்னிட்டு மரம் நாடும் விதமாக பனை விதைகளை நட்டு விழிப்புணர்வை ஏற்படுத்தி உள்ளார். மதுரை மாவட்டம் உசிலம்பட்டி பேருந்து நிலையம் எதிரில் உள்ள கண்மாய் கரை பகுதிகளில் பனை விதைகளை அவர் நட்டார்.
பின் அவர் செய்தியாளர்களிடம் கூறுகையில், பனைமரத்தின் பயன்கள் பலருக்கு தெரியாது. இவை பல வருடங்கள் வாழக்கூடியது. எத்தகைய வறட்சியையும் தாக்குப்பிடித்து மற்ற எல்லா வளங்களும் வற்றி வறண்டுபோன பிறகும் கூட மனித இனத்தைக் காப்பாற்றி பயன்தரக்கூடியது.
எனது சொந்த ஊரான உசிலம்பட்டியில் இயற்கையைப் பாதுகாக்கும் வகையில், பனை விதைகளை நட்டது மகிழ்ச்சியளிக்கிறது. இதே போல் பசுமை ஆர்வலர்கள் உதவியுடன் தமிழ்நாடு முழுவதும் பனை விதைகளை நட இருக்கிறோம்.
ஒவ்வொருவரும் தங்களது ஊரில் உள்ள கண்மாய் குளங்களை தூர்வாரி மழைநீரை சேமிக்க நடவடிக்கை எடுக்க வேண்டும். தூர்வாரி சுத்தம் செய்வது மட்டுமல்லாமல் அதனை முறையாக பராமரிக்க இளைஞர்கள் ஆர்வதோடு செய்ய வேண்டும். நான் இந்த பனை மரங்களை நட்டதோடு மட்டுமல்லாமல், இதனை பராமரிப்பதை சவாலாக எடுத்துள்ளேன். இந்த கண்மாயை பராமரிக்க கோரி மாவட்ட ஆட்சியரிடம் மனு கொடுத்துள்ளேன் என்றார்.
