மதுரை: தமிழ்நாட்டிலுள்ள முக்கியமான நடுகற்கள் குறித்த நான்கு நாள் விழிப்புணர்வு கண்காட்சி, 'தமிழக நடுகல் மரபு' என்ற தலைப்பில் மதுரை காமராசர் பல்கலைக்கழகத்தில் இன்று (டிச.14) தொடங்கியது. பல்கலைக்கழக வரலாற்றுப்புலம், தமிழ்நாடு தொல்லியல்துறை, ரோஜா முத்தையா ஆராய்ச்சி நூலகம் மற்றும் யாக்கை மரபு அறக்கட்டளை ஆகியவை இணைந்து இந்த கண்காட்சியை நடத்துகின்றன.
இந்த நிலையில் யாக்கை மரபு அறக்கட்டளையின் அறங்காவலர் சுதாகர் நல்லியப்பன் ஈடிவி பாரத் தமிழ்நாடு செய்திகளுக்கு அளித்த பிரத்யேக பேட்டியில், 'இந்த கண்காட்சியில் அமைக்கப்பட்டுள்ள இந்த கல்வெட்டு, டிஜிட்டல் முறையில் பதிவு செய்யப்பட்டு அச்செடுக்கப்பட்டதாகும்.
தமிழ்நாடு முழுவதும் உள்ள கல்வெட்டுகள் காலப்போக்கில் அழிவைச் சந்திக்க நேரிடலாம். 4,000 ஆண்டுகள் ஆகிவிட்டாலே கல்வெட்டில் உள்ள எழுத்துகள், வெப்பநிலை ஏற்ற இறக்கம் காரணமாக அழிந்து விடும். அதேபோல் டிஜிட்டல் முறையில் ஸ்கேன் செய்து வைத்துக் கொண்டால், அவற்றை எந்தக் காலத்திலும் 3டி முறையில் அச்செடுத்து மீண்டும் பயன்படுத்திக் கொள்ளலாம்.
மேலும் இதுபோன்ற பிரதிகளை ஆய்வு செய்வதற்கும், ஓரிடத்திலிருந்து வேறொரு இடத்திற்குக் கொண்டு செல்வதற்கும் இயலும். இதனை ஸ்கேன் செய்யக்கூடிய இயந்திரம் ஜெர்மன் நிறுவன வடிவமைப்பாகும். கர்நாடகாவில்தான் தற்போது இந்த தொழில்நுட்பத்தைப் பயன்படுத்தி அவர்களது தொன்மங்களை ஆவணப்படுத்தி வருகிறார்கள்.
அடுத்தபடியாக தமிழ்நாட்டில் நாங்கள்தான் செய்துள்ளோம். இதற்கு அதிக பொருட்செலவாகும். இதனை தமிழ்நாடு அரசுதான் செய்ய முடியும். கோயில் கல்வெட்டுகள் உள்பட தமிழ்நாடு முழுவதும் 30,000க்கும் மேற்பட்ட கல்வெட்டுகள் உள்ளன. அவை காலப்போக்கில் அழிவைச் சந்திக்க நேரிடலாம்.
எழுத்துகள் எப்படியெல்லாம் வளர்ச்சியை அடைந்துள்ளது என்பதை ஆய்வு செய்வதற்கு இந்த தொழில்நுட்பம் பெரிதும் பயன்படும். முக்கியத்துவம் வாய்ந்த நடுகற்களை இதுபோன்ற தொழில் நுட்பத்தில் ஆவணப்படுத்துவதற்கு குறைந்தபட்சம் ரூ.1 லட்சம் வரை செலவாகும். இது கல்வெட்டின் அளவைப் பொறுத்து மாறுபடும்.
அச்செடுத்தும் பயன்படுத்தலாம். இல்லையென்றால் கணினியில் பதிவு செய்து அதனையும் பயன்படுத்தலாம். எங்களுடைய இந்த கண்காட்சிக்கு தமிழ்நாடு தொல்லியல் துறைதான் பெரிய அளவில் உதவி செய்துள்ளது. முப்பரிமாண அச்சுப் பிரதியெடுக்கவும் தமிழ்நாடு அரசுதான் உதவியது. இதன் அடுத்தகட்டமாக தமிழ்நாட்டிலுள்ள அனைத்துக் கல்வெட்டுகளையும் பாதுகாக்க முப்பரிமாண டிஜிட்டல் தொழில்நுட்பத்தைப் பயன்படுத்துவது அவசியம்” என்றார்.
இதையும் படிங்க: அமைச்சர் இல்ல திருமண விழா: அனுமதி பெறப்பட்ட யானைகள் பயன்படுத்தப்பட்டதா?
