கிருஷ்ணகிரி மாவட்டம், ஓசூர் அடுத்த எலுவப்பள்ளி கிராமத்தைச் சேர்ந்தவர் சின்னய்யா (60). எம்ஜிஆரின் தீவிர ரசிகரான இவர், அவரைப் போலவே உடை அணிந்து பல்வேறு நிகழ்ச்சிகளில் பங்கேற்பதால் 'எம்ஜிஆர் சின்னய்யா' என அனைவராலும் பரவலாக அழைக்கப்பட்டு வந்தார்.
அதிமுகவில் நீண்ட நாட்களாகத் தொண்டராக இருந்து வரும் சின்னய்யா, தேர்தல் பிரசாரங்களில் அனைவரின் கவனத்தையும் ஈர்த்தாலும், பல முறை உள்ளாட்சித் தேர்தலில் போட்டியிட விருப்பம் தெரிவித்தும், இதுவரை அவருக்கு அதிமுகவில் வாய்ப்பளிக்கவில்லை எனக் கூறப்படுகிறது.
அதிமுக தலைமை மீது விசுவாசம் கொண்ட இவர், உள்ளூர் அரசியல் தலையீட்டால் சீட் கிடைப்பதில்லை என்கிற விரக்தியில் ஓசூர் ஊராட்சி ஒன்றியம், மாவட்ட ஊராட்சிக் குழு உறுப்பினர் பதவிக்கு போட்டியிட தனது மகள் கீதா என்பவரை வேட்பு மனு தாக்கல் செய்ய வைத்தார்.
இன்று கீதா வேட்பு மனு தாக்கல் செய்யும் போது, தந்தை சின்னைய்யா எம்ஜிஆர் வேடமிட்டு வந்தது மற்ற வேட்பாளர்களையும் வெகுவாகக் கவர்ந்தது.
இதையும் படிங்க: 'வாகனங்களுக்கான காப்பீட்டுத் திட்டம் மாற்றம்' - மறுபரிசீலனை செய்ய ஆட்சியரிடம் மனு!
