கிருஷ்ணகிரி மாவட்டத்தில் செப்டம்பர் 23ஆம் தேதி முதல் இன்றுவரையில் நீர்நிலைகளில் மூழ்கி மொத்தம் 19 பேர் இறந்துள்ளனர். இந்நிலையில் நீர்நிலைகளில் ஏற்படும் மரணங்களைத் தடுக்க மேற்கொள்ளப்பட்டுவரும் பாதுகாப்பு, விழிப்புணர்வு குறித்த செய்தியாளர்கள் சந்திப்பு இன்று மாவட்ட ஆட்சியர் அலுவலகத்தில் நடைபெற்றது.
இதில் உரையாற்றிய மாவட்ட ஆட்சியர் பிரபாகர், கிருஷ்ணகிரி மாவட்டத்தில் கடந்த 23ஆம் தேதி முதல் இன்றுவரையில் நீர்நிலைகளில் மூழ்கி எட்டு மாணவர்கள், எட்டு மாணவியர், பூ வியாபாரி என மொத்தம் 19 பேர் இறந்துள்ளனர். இது மிகவும் கவலைக்குரிய சம்பவமாகும் என வேதனை தெரிவித்தார்.
மேலும், பொதுமக்கள் தங்களின் பிள்ளைகளை நீர்நிலைகளின் அருகில் செல்லாதவாறு கண்காணிக்க வேண்டும். ஒவ்வொரு கிராமப் பகுதியிலும் உள்ள நீர்நிலைகளின் அருகில் எச்சரிக்கை பலகை வைத்தும் ஆட்டோ, பேருந்துகளில் நீர்நிலைகளின் பாதுகாப்பு குறித்தும் போதிய விழிப்புணர்வுப் பரப்புரை மேற்கொள்ளப்படும் என்று கூறினார்.
மாணவர்கள் தங்களின் விடுமுறை நாள்களை பாதுகாப்பாக பெற்றோரின் முன்னிலையில் கழிக்க வேண்டும். பெற்றோர் தங்களின் பிள்ளைகளின் மீது தொடர் கவனம் செலுத்த வேண்டும் என்றும் கேட்டுக்கொண்டார்.
தேவையான உதவிகளை மேற்கொள்ள 1077 அவசரகால இலவச தொலைபேசி எண் கொண்ட உதவி மையம் ஆட்சியர் அலுவலகத்தில் ஏற்படுத்தப்பட்டுள்ளது. அனைத்துப் பள்ளிகளிலும் மாணவர்களுக்கு நீர்நிலை பாதுகாப்பு குறித்து ஆசிரியர்கள் அறிவுரை வழங்க வேண்டும் என கேட்டுக் கொள்ளப்பட்டுள்ளதாகவும் கூறினார்.
இதையும் படிங்க : சென்னை குடிநீருக்காக வினாடிக்கு 20 கனஅடி நீர் திறந்துவைப்பு!
