கிருஷ்ணகிரி மாவட்டம், காவேரிப்பட்டினத்தில் மகா சிவராத்திரியை முன்னிட்டு ஆண்டுதோறும் அங்காளம்மன், பூங்காவனத்தம்மன் கோயில்களில் மயானக்கொள்ளை தேர்த்திருவிழா நடைபெறுவது வழக்கம். அதன்படி இந்தாண்டும் அங்காளம்மன் கோயில் மகா சிவராத்திரி, மயானக்கொள்ளை திருவிழா பிப்ரவரி 22ஆம் தேதி தொடங்கி நடைபெற்று வருகிறது.
விழாவின் முக்கிய நாளான நேற்று முகவெட்டு எடுத்து ஆற்றங்கரை செல்லும் நிகழ்ச்சி நடைபெற்றது. இதைத்தொடர்ந்து பக்தர்கள் அலகு குத்தியும் உடல் முழுவதும் எலுமிச்சைப் பழங்களை குத்தியபடி காளி வேடம் அணிந்தும் ஊர்வலமாக வந்து அம்மனுக்கு நேர்த்திக்கடன் செலுத்தினர்.
அலகு குத்திக்கொண்டு மயானம் செல்லும் நிகழ்ச்சியைத் தொடர்ந்து, திருத்தேர் மயானம் புறப்படுதல் நிகழ்ச்சியும் நடைபெற்றது. தேர் இழுக்கும் நிகழ்ச்சியை அறநிலையத்துறை இணை ஆணையர் ராஜமாணிக்கம் தொடங்கி வைத்தார் .
மயான சூறை விழாவையொட்டி, அலங்கரிக்கப்பட்ட தேரில் அங்காளம்மன் ஊர்வலமாக புறப்பட்டு காவேரிப்பட்டினம் நகரின் முக்கிய வீதியான பன்னீர்செல்வம் தெரு, பேருந்து நிலையம் வழியாக ஆற்றங்கரைக்குச் சென்றடைந்தார்.
விழாவில் பக்தர்கள் அலகு குத்தி, அந்தரத்தில் தொங்கியபடி வந்து சாமிக்கு தீப ஆராதனை காட்டியும் மலர்த் தூவியும் குழந்தைகளை தூக்கி வந்தும் அம்மனை வழிபட்டனர். இந்தக் காட்சி அங்கு கூடியிருந்தவர்களை மெய்சிலிர்க்க வைத்தது.
மேலும், வழி நெடுகிலும் அன்னதானம், மோர், குளிர்பானங்கள், குடிநீர் என அனைத்தும் இலவசமாக வழங்கப்பட்டது. இதனைத் தொடர்ந்து சாமியின் தேர் தென்பெண்ணை ஆற்று பாலத்தைக் கடந்து ஆற்றங்கரையை சென்றடைந்தது. விழாவில் கிருஷ்ணகிரி மாவட்டம் மட்டுமின்றி தருமபுரி, திருவண்ணாமலை, வேலூர் உள்ளிட்ட மாவட்டங்களில் இருந்தும், ஆந்திரா, கர்நாடகா உள்ளிட்ட மாநிலங்களில் இருந்தும் ஏராளமான பக்தர்கள் கலந்து கொண்டு சாமி தரிசனம் செய்தனர்.
இவ்விழாவில் ஏற்படும் அசம்பாவிதங்களைத் தடுக்க 150க்கும் மேற்பட்ட காவல் துறையினர், காவல் ஆய்வாளர் வெங்கடாசலம் தலைமையில் பாதுகாப்புப் பணியில் ஈடுபட்டனர். இந்நிகழ்ச்சியில் 20ஆயிரத்திற்கும் மேற்பட்ட பொதுமக்கள் கலந்துகொண்டனர்.
இதையும் படிங்க: 'வல்லாளகண்டனை வதம் செய்த காளி' - ஆக்ரோஷ நடனம்
