கரூர்: கரூர் நகராட்சிக்குட்பட்ட பசுபதீஸ்வரர் பெண்கள் மேல்நிலைப்பள்ளி, ஆரம்ப சுகாதார நிலையம் , கரூர் மாவட்ட நீதிமன்ற வளாகம், வெங்கமேடு கிழக்கு ஆரம்ப சுகாதார நிலையம் ஆகிய நான்கு இடங்களில் தடுப்பூசி முகாம் நடைபெற்று வருகின்றது. அனைத்து தடுப்பூசி மையங்களிலும் ஏராளமானோர் அதிகாலை முதலே நீண்ட வரிசையில் தடுப்பூசி செலுத்திக் கொள்வதற்காக காத்திருந்தனர்.
பசுபதீஸ்வரர் பெண்கள் மேல்நிலைப்பள்ளி வளாகம் முன்பு சுமார் 500-க்கும் மேற்பட்டோர் தடுப்பூசி செலுத்தி கொள்வதற்காக, சுமார் ஒரு கிலோ மீட்டர் தொலைவுக்கு நீண்ட வரிசையில் காத்திருந்தனர். ஆனால் இன்று (ஜூன்.6) 200 பேருக்கு மட்டுமே தடுப்பூசி செலுத்தப்பட உள்ளதாகவும், அவர்களுக்கு முன்பே டோக்கன் வழங்கப்பட்டு விட்டது என்று பாதுகாப்பு பணியிலிருந்த காவல்துறையினர் தெரிவித்தனர்.
இதனால் அங்கு காத்திருந்த மக்கள் காவல்துறையினரிடம் வாக்குவாதத்தில் ஈடுபட்டனர். காவல்துறையினர் கூறியும் பொதுமக்கள் கலைந்து செல்ல மறுத்ததால் சிறிது நேரம் அங்குப் பரபரப்பு ஏற்பட்டது. இதுகுறித்து சதாசிவம் என்பவர் கூறியதாவது, "தொடர்ந்து மூன்று நாட்களாகத் தடுப்பூசி செலுத்திக் கொள்ள அதிகாலையிலேயே வருகிறேன். ஆனால் முன்பு டோக்கன் பெற்றவர்களுக்கு மட்டுமே தடுப்பூசி எனக் கூறி வருகின்றனர். டோக்கன் முறையும் சரியாகப் பின்பற்றவில்லை. இதுபோன்று பொதுமக்களை அலைக்கழிக்கும் நிலையை மாற்ற சுகாதாரத்துறையினர் உரிய நடவடிக்கை எடுக்க வேண்டும்" என்றார்.
இதையும் படிங்க: தமிழ்நாடு வளர்ச்சி கொள்கை - உறுப்பினர்கள் நியமனம்
