"பெண்களின் நிலை உயர்ந்தால்தான் நாட்டின் நிலை உயரும் - அமைச்சர் விஜயபாஸ்கர்

கரூர்: பெண்களின் நிலை உயர்ந்தால்தான் நாட்டின் நிலை உயரும் என்பதை உணர்ந்தே தமிழ்நாடு அரசு திட்டங்களை செயல்படுத்துகிறது என போக்குவரத்துத் துறை அமைச்சர் விஜயபாஸ்கர் கூறியுள்ளார்.

கரூர் மாவட்டத்திற்கான தமிழ்நாடு முதலமைச்சரின் குறைதீர்ப்பு கூட்டம் இன்று தாந்தோனியில் நடைபெற்றது. இந்நிகழ்ச்சியில் தமிழ்நாடு போக்குவரத் துறை அமைச்சர் எம்.ஆர்.விஜயபாஸ்கர் கலந்துகொண்டு காந்திகிராமம், முத்துலாடம்பட்டி உள்ளிட்ட பகுதிகளில் பொதுமக்களிடமிருந்து மனுக்களை பெற்றுக்கொண்டார்.

இந்நிகழ்ச்சியில் பொதுமக்களிடையே பேசிய அவர், "பெண்களின் நிலை உயர்ந்தால்தான் குடும்பத்தின் நிலை உயரும். குடும்பத்தின் நிலை உயர்ந்தால்தான் நாட்டின் நிலை உயரும் என்பதை கருத்தில் கொண்டு தமிழ்நாடு அரசு திட்டங்களைத் தீட்டி செயல்படுத்திவருகிறது. பெண்களுக்கு திருமண உதவித்தொகை, தாலிக்கு தங்கம், கர்ப்பிணி பெண்களுக்கான சலுகைகள் உள்ளிட்ட பல்வேறு திட்டங்களை முன்னாள் முதலமைச்சர் ஜெயலலிதாவிற்கு பிறகும் தொடர்ந்து தமிழ்நாடு அரசு வழங்கி வருகிறது" என்று தெரிவித்தார்.