கரூர் நகரிலுள்ள ஹோட்டலில் மக்கள் தேசம் கட்சியின் தலைவர் வழக்கறிஞர் ஆசைத்தம்பி இன்று ஈடிவி பாரத் செய்திக்குப் பேட்டியளித்தார். அந்தப் பேட்டியில், ''மணிப்பூர் கலவரத்தை அம்மாநிலத்தை ஆளும் பாஜக தலைமையிலான அரசு வன்முறையை கட்டவிழ்த்துவிட்டு வேடிக்கை பார்த்து வருகிறது. இதற்கு மத்தியில் ஆளும் மோடி தலைமையிலான அரசும் துணையாக இருந்துள்ளது.
மணிப்பூரில் நடைபெற்ற கலவரம் மற்றும் பெண்களை மானபங்கப்படுத்தி ஊர்வலமாக அழைத்துச் சென்ற சம்பவத்தை மக்கள் தேசம் கட்சி வன்மையாக கண்டிக்கிறது. இதனைக் கண்டித்து சேலம், திருவள்ளூர், மாவட்டங்களில் கண்டன ஆர்ப்பாட்டம் நடத்தினோம். மணிப்பூர் கலவரம் பின்புலத்தில் ஆர்எஸ்எஸ் என்ற அமைப்பு வழிகாட்டுதலில் நடைபெற்றுள்ளதாக சந்தேகம் ஏற்பட்டுள்ளது. மீண்டும் இந்தியாவில் பாரதிய ஜனதா கட்சி, ஆட்சியைப் பிடிக்க கலவரங்களைத் தூண்டி வருகிறது.
தமிழ்நாட்டில் ஆணவப் படுகொலை அடுத்தடுத்து நிகழ்ந்து வருகிறது. புதுக்கோட்டை மாவட்டம், கறம்பக்குடி தாலுகாவில் வெள்ளாளக்கொல்லை பகுதியில் திமுக கிளைச் செயலாளர் ரவி என்பவர், திட்டமிட்டு சாதிய ஆணவப் படுகொலை செய்யப்பட்டார். இச்சம்பவத்திற்கு, இதுவரை தமிழ்நாடு அரசு எவ்வித நடவடிக்கையும் மேற்கொள்ளவில்லை. சமூகநீதிக்காக போராடி வருவதாக கூறும், தமிழ்நாடு முதலமைச்சர் முத்துவேல் கருணாநிதி ஸ்டாலின், வெள்ளாளக்கொல்லை பகுதியில் நடைபெற்ற படுகொலை சம்பவத்திற்கு, இதுவரை கொலை வழக்காகக் கூட பதிவு செய்யாமல், குற்றவாளிகளுக்கு துணை போகும் வகையில் செயல்பட்டு வருகிறார்.
இதற்குக் காரணமான மணல் மாஃபியா கரிகாலனை கைது செய்து நீதிமன்றத்தில் நிறுத்தி தமிழ்நாடு அரசு தண்டனை பெற்றுத்தர வேண்டும். மேலும், 2ஜி ஸ்பெக்ட்ரம் வழக்கில் சிறை சென்ற திமுகவைச் சேர்ந்த ஆ.ராசாவுக்கு, ஆதரவு திமுக தரவில்லை. அவரே சிறையில் இருந்த படி, நீதிமன்றத்தில் தானாக வாதாடி, தன்னை விடுவித்துக் கொண்டார். ஆனால், கரூரைச் சேர்ந்த அமைச்சர் செந்தில் பாலாஜி உயர்சாதி இந்து என்பதால், அமலாக்கத்துறையால் கைது செய்யப்பட்டு, சிறையில் இருந்த போதும் அமைச்சர் பதவியைப் பறிக்காமல், திமுக நேரடியாக ஆதரவளித்து வருகிறது.
அமலாக்கத்துறை தவறு செய்திருந்தால் தனிப்பட்ட முறையில், திமுக, அமலாக்கத்துறை அதிகாரி மீது நடவடிக்கை மேற்கொள்ள நீதிமன்றத்தை அணுகி இருக்கலாம். ஆனால், திமுகவின் அமைதி காக்கும் போக்கு செந்தில் பாலாஜியின் குற்றத்தை ஒப்புக் கொண்டதாகவே கருத முடிகிறது. இவ்வாறான தமிழ்நாடு அரசின் போக்கு தமிழ்நாட்டில் மக்கள் உற்று நோக்கி கவனித்துக் கொண்டிருக்கிறார்கள். மக்கள் புரட்சி வெடிக்கும் பொழுது நிச்சயம் திமுக அரசு வீட்டுக்கு அனுப்பப்படும். இதே நிலைதான் மத்தியில் ஆளும் பாரதிய ஜனதாவுக்கும் ஏற்படவுள்ளது.
சாதிய வன்கொடுமைகள், படுகொலைகள், பழங்குடியின மக்கள் மீதான வன்முறை தாக்குதல்களுக்கு ஆட்சியாளர்களே முழு பொறுப்பு. சட்டமேதை அம்பேத்கர் படத்தை நீதிமன்ற வளாகத்திற்குள் அகற்ற வேண்டும் என்ற உத்தரவு திரும்ப பெறப்பட்டிருப்பது ஒன்றிய, மாநில அரசின் நிலையற்ற தன்மையைக் காட்டுகிறது.
வழக்கறிஞர்கள் அரசியல் கட்சித் தலைவர்கள் எதிர்ப்பினால் அரசு அம்பேத்கர் படத்தை நீதிமன்றத்தில் இருந்து எடுக்கும் முடிவில் பின்வாங்கியுள்ளது. ஆணவப் படுகொலைகள் தொடர்ந்து இந்தியா முழுவதும் நடைபெற்று வருகிறது. ஆனால், இதன் பின்புலத்தை மாற்றி ஒவ்வொரு முறையும் ஏதாவது ஒரு காரணத்தைக் கூறி அரசு தப்பித்துக் கொள்ள பார்க்கிறது. திமுக சாதி வெறிபிடித்த கட்சியாக செயல்படுகிறது'' என தெரிவித்தார்.
இதையும் படிங்க: "ரூ.5,600 கோடி ஊழல்" - ஆளுநரிடம் இரும்பு பெட்டியில் 'திமுக பைல்ஸ்-2' ஆவணங்களை வழங்கிய அண்ணாமலை!
