நிற்காமல் செல்லும் அரசு பேருந்துகள்; போராட்டத்தில் ஈடுபட்ட பொதுமக்களை மிரட்டிய போலீசார்!

கரூர் - கோவை சாலையில் க.பரமத்தி பேருந்து நிறுத்தத்தில் அரசு பேருந்து நிற்காது என கூறி கரூர் பேருந்து நிலையத்தில் பயணிகளை ஏற்ற மறுத்ததால், அப்பேருந்து க.பரமத்தி பேருந்து நிறுத்தத்திற்கு சென்ற போது, பொதுமக்கள் சிறை பிடித்து போராட்டத்தில் ஈடுபட்டனர்.

கரூர்: கரூர் நகர பேருந்து நிலையத்திலிருந்து கோவை மார்க்கமாக செல்லும் அரசு பேருந்துகள் க.பரமத்தி பேருந்து நிறுத்தத்தில் நிற்காது என பயணிகளிடம் கூறியதால் பயணிகள் வாக்குவாதத்தில் ஈடுபட்டனர். பின்னர் ஒரு வழியாக பயணிகளை ஏற்றுக்கொண்டு கோவையை நோக்கி அரசு பேருந்து ஒன்று க.பரமத்தி பேருந்து நிறுத்தம் அருகே சென்றபோது, அப்பகுதியை சேர்ந்த பொதுமக்கள் பயணிகளுக்கு ஆதரவாக, அரசு பேருந்தை சிறைபிடித்து நேற்று இரவு 7 மணி அளவில் போராட்டத்தில் ஈடுபட்டனர்.

இதனால் அப்பகுதியில் பரபரப்பு ஏற்பட்டது. இதனையடுத்து அங்கு வந்த க.பரமத்தி போலீசார் பொதுமக்களிடம் பேச்சுவார்த்தை நடத்தி பேருந்தை மீட்டு அனுப்பி வைத்தனர். இதனால் சுமார் அரை மணி நேரத்துக்கு மேலாக அப்பகுதியில் போக்குவரத்து பாதிப்பு ஏற்பட்டது.

இதனைத் தொடர்ந்து க.பரமத்தி பகுதியைச் சேர்ந்த திராவிட கழகத்தின் கரூர் மாவட்ட நிர்வாகி வடிவேல் ராமசாமி ஈ டிவி பாரத் தமிழ்நாடு செய்திகளுக்கு அளித்த சிறப்பு பேட்டியில், “கரூர் நகரப் பேருந்து நிலையத்தில் இருந்து கிளம்பும் அரசு பேருந்துகள் திருப்பூர் கோவை செல்வதற்கு ஐந்து நிமிடத்திற்கு ஒரு பேருந்து என்ற வீதம் கரூர் பேருந்து நிலையத்திலிருந்து இயக்கப்படுகிறது.

ஆனால் கரூருக்கு 18 கிலோமீட்டர் தொலைவில் உள்ள முதல் பேருந்து நிறுத்தம் க.பரமத்தி பேருந்து நிறுத்தம் ஆகும். சுமார் 50க்கும் மேற்பட்ட முக்கிய கிராமங்களுக்கு செல்லும் பொதுமக்கள் பேருந்து வசதியை பயன்படுத்தி வருகின்றனர். கரூர் - கோவை தேசிய நெடுஞ்சாலை விரிவாக்கத்திற்கு பிறகும், முன்பும் அனைத்து பேருந்துகளும் நின்று செல்லும் பேருந்து நிறுத்தமாக இருந்தது.

கடந்த சில ஆண்டுகளாக அரசு போக்குவரத்துக் கழக பேருந்துகள் மட்டும் நிற்க மறுப்பதால் நுகர்வோர் நீதிமன்றத்தில் வழக்கு தொடர்ந்து அனைத்து போக்குவரத்து கழகப் பேருந்துகளும் நின்று செல்லும் என உத்தரவாதம் அளிக்கப்பட்டு, நீதிமன்ற தீர்ப்பும் பெறப்பட்டது.

ஆனால் இன்றுடன் நான்கு முறை நிற்காமல் செல்லும் அரசு போக்குவரத்தை சிறை பிடித்து சாலை மறியல் போராட்டம் நடத்தியுள்ளோம். ஒவ்வொரு முறையும் பரமத்தி காவல்துறையினர் பேருந்தை மீட்டு அனுப்பிவிட்டு, போராட்டத்தில் ஈடுபட்ட மக்களை வழக்கு பதிவு செய்வோம் என மிரட்டுவதை மட்டுமே செய்து வருகின்றனர்.

பொதுமக்களுக்காக போராடும் என் மீது க.பரமத்தி காவல் ஆய்வாளர் வழக்கு பதிவு செய்து சிறையில் தள்ளுவேன் என மிரட்டுகிறார். பாதிக்கப்படும் பொது மக்களுக்கு ஆதரவாக செயல்பட வேண்டிய அரசு அதிகாரி, மக்களையும் தன்னையும் மிரட்டி அச்சுறுத்துவது போன்ற செயல்களில் ஈடுபட்டு வருகிறார். போக்குவரத்து கழக மண்டல மேலாளர்கள் இப்பிரச்சனைக்கு நிரந்தரக தீர்வு காண வேண்டும்” என கோரிக்கை விடுத்தார்.