கரூர் மாநகராட்சியில் உள்ள காமராஜ் தினசரி காய்கறி மார்க்கெட் ரூ. 6.75 கோடி மதிப்பீட்டில் புனரமைக்கும் பணிக்கான பூமி பூஜை இன்று கரூர் மாவட்ட ஆட்சித்தலைவர் பிரபுசங்கர் தலைமையில் நடைபெற்றது.
நிகழ்ச்சியில் சிறப்பு அழைப்பாளராக மின்சார மற்றும் மதுவிலக்கு ஆயத்தீர்வைத்துறை அமைச்சர் செந்தில்பாலாஜி கலந்துகொண்டு புதிய பூமி பூஜையிட்டு பணிகளைத் தொடக்கிவைத்தார்.
சுமார் 75 ஆண்டுகள் பழமைவாய்ந்த காமராஜ் தினசரி காய்கறி மார்க்கெட் புரனமைக்கப்பட வேண்டும் என நீண்ட நாள் கோரிக்கை வைக்கப்பட்டு வந்தது. திமுக தன்னுடைய தேர்தல் அறிக்கையில் அளித்த வாக்குறுதியின்படி, இன்று புதிய காய்கறி வணிக வளாகம் அமைப்பதற்கான பணிகள் தொடங்கப்பட்டுள்ளன.
கரூர் காமராஜ் தினசரி காய்கறி மார்க்கெட் மூலம் பழக்கடைகள், காய்கறிக்கடைகள், வாழை மண்டிகள், மளிகைக்கடைகள், கறிக்கடைகள், டீக்கடைகள் என மொத்தமாக 174 கடைகளை ஒருங்கிணைத்து இந்த மார்க்கெட் அமைக்கப்பட உள்ளது.
கரூர் மாநகராட்சி காமராஜர் காய்கறி வணிக வளாகத்தினால் தினசரி ஆயிரக்கணக்கான மக்கள் பயன் அடைவது மட்டுமல்லாமல் நீண்டநாட்களாக மார்க்கெட் பகுதியில் ஏற்படும் போக்குவரத்து நெரிசல் பிரச்னைக்கும் தீர்வு எட்டப்பட்டுள்ளது என்பது குறிப்பிடத்தக்கது.
இந்நிகழ்ச்சியில் கரூர் மாநகராட்சி மேயர் கவிதா, துணைமேயர் சரவணன், மாநகராட்சி ஆணையாளர் ரவிச்சந்திரன், பொறியாளர் நக்கீரன், கரூர் மாவட்ட வர்த்தக சங்கத் தலைவர் ராஜு, செயலாளர் வெங்கடராமன், கரூர் அண்ணா பவளவிழா தினசரி காய்கறி வியாபாரிகள் நலச்சங்கத்தின் தலைவர் அசோக்குமார், செயலாளர் பன்னீர்செல்வம், கரூர் மாநகராட்சி மாமன்ற உறுப்பினர்கள் அன்பரசன்,ராஜா,பிரேமா உள்ளிட்டப் பலர் கலந்து கொண்டனர்.
இதையும் படிங்க : கோயம்பேடு மார்க்கெட்டுக்கு வரத்து குறைவு.. காய்கறி விலைகளில் மாற்றம்!
