கன்னியாகுமரி மாவட்டத்தில் பள்ளி மாணவ மாணவியருக்கு விலையில்லா மடிக்கணினி வழங்கும் நிகழ்ச்சிக்காக வருகைதந்த தமிழ்நாடு அரசின் பள்ளிக் கல்வித் துறை அமைச்சர் செங்கோட்டையனுக்கு தமிழ்நாடு அரசின் டெல்லி சிறப்புப் பிரதிநிதி தளவாய் சுந்தரம் தலைமையில் வரவேற்பு அளிக்கப்பட்டது.
இந்நிகழ்ச்சியில் மாவட்ட ஆட்சியர் பிரசாந்த் மு வடநேரே காவல் கண்காணிப்பாளர் ஸ்ரீநாத் உள்ளிட்ட உயர் அலுவலர்களும் அதிமுக நிர்வாகிகளும் திரளாகக் கலந்துகொண்டனர்.
பின்னர், செய்தியாளர்களைச் சந்தித்த அமைச்சர் செங்கோட்டையன் கூறியதாவது, "இந்தியாவே வியக்கும் வகையில் தமிழ்நாடு பிற மாநிலங்களைக் காட்டிலும் அனைத்துத் துறைகளிலும் முன்னோடியாகத் திகழ்கிறது. மாணவர்களின் நலனைக் கருத்தில் கொண்டு பள்ளிக் கல்வித் துறை பல்வேறு நடவடிக்கைகளை எடுத்துவருகிறது.
குறிப்பாக எல்கேஜி, யுகேஜி கொண்டுவந்து தமிழோடு ஆங்கிலத்தை எளிதாக கற்றுக் கொள்ளும் வகையில் கற்பிக்கப்படுகிறது. 1,200 கோடி ரூபாய் மதிப்பில் கழிவறைகள் அமைக்கப்படும். அடுத்தக் கல்வி ஆண்டில் 5 லட்சம் மாணவர்களை அரசுப் பள்ளியில் சேர்க்க நாங்கள் செயல்பட்டுவருகிறோம்.
முதலமைச்சராக ஜெயலலிதா இருந்தபோது இந்தியாவில் எந்த மாநிலமும் செய்யாத வகையில் 54 லட்சத்து 62 ஆயிரம் மடிக்கணினிகள் வழங்கப்பட்டுள்ளன. பள்ளிக் கல்வித் துறையில் எந்தக் குறைபாடும் இல்லை. அவ்வாறு இருக்கும் குறைபாடுகளைச் சரி செய்துவருகிறோம்.
நீட் தேர்வில் 100 விழுக்காடு விலக்கு அளிக்க வேண்டும் என்பதுதான் தமிழ்நாடு அரசின் நிலைப்பாடு. தமிழ்நாட்டில் அரசு அனுமதி இல்லாமல் இயங்கும் பள்ளிகளை மூட நடவடிக்கை எடுக்கப்பட்டுவருகிறது. ஆனால் சில பள்ளி நிர்வாகம் நீதிமன்றத்தை நாடுகிறது.
ஆனால் நீதிமன்றம் கல்வித் துறைக்குச் சாதகமாகத் தீர்ப்பு வழங்குகிறது. தற்போது உள்ள பாடத்திட்டத்தில் பயிலும் மாணவர்கள் நீட் தேர்வை எதிர்கொள்ளும் வகையில் பாடத்திட்டங்கள் அமைந்துள்ளன. இதனை உத்தரப்பிரதேச துணை முதலமைச்சரும் வரவேற்றுள்ளார். இந்தப் பாடத்திட்டத்தைத் தயாரித்த கல்வியாளர்களை அந்த மாநிலத்திலும் கேட்டுள்ளார்கள்" எனத் தெரிவித்தார்.
