கரோனா தடுப்பு மற்றும் மாவட்ட வளர்ச்சி பணிகள் குறித்த ஆய்வுக்கூட்டம் தமிழ்நாடு முதலமைச்சர் தலைமையில் மாநிலம் முழுவதும் மாவட்டம் வாரியாக நடைபெற்றுவருகிறது.
அந்த வகையில் குமரி மாவட்ட வளர்ச்சிப்பணிகள், கரோனா தடுப்பு பணிகள் குறித்த ஆய்வுக் கூட்டம் நாகர்கோவிலில் உள்ள மாவட்ட ஆட்சியர் அலுவலகத்தில் இன்று (நவ.,11) நடைபெறுகிறது. இதில் கலந்துகொள்ள தமிழ்நாடு முதலமைச்சர் எடப்பாடி பழனிசாமி கன்னியாகுமரி மாவட்டத்திற்கு வருகை தந்தார். அவரை மாவட்ட எல்லையான ஆரல்வாய்மொழியில் குமரி மாவட்ட ஆட்சியர் எம் அரவிந்த் மற்றும் காவல் கண்காணிப்பாளர் பத்ரி நாராயணன் பூங்கொத்து கொடுத்து வரவேற்றனர்.
பின்னர் திரண்டிருந்த அதிமுகவினர் தமிழ்நாடு அரசின் டெல்லி சிறப்பு பிரதிநிதி தளவாய் சுந்தரம் தலைமையில் முதலமைச்சருக்கு பூரண கும்ப மரியாதை செலுத்தி வரவேற்பு அளித்தனர். ஆரல்வாய்மொழி, தோவாளை, வெள்ளமடம், வடசேரி என நாகர்கோவில் செல்லும் சாலையில் 9 இடங்களில் அதிமுகவினர் வரவேற்பு அளித்தனர்.
நலத்திட்ட உதவிகள்
இன்று நடைபெறும் ஆய்வு கூட்டத்தில் 268.58 கோடி ரூபாய் மதிப்பிலான முடிவுற்ற பணிகள், புதிய திட்டப்பணிகளை முதலமைச்சர் தொடங்கி வைக்கிறார். சுமாராக 2736 பயனாளிகளுக்கு அரசு நல திட்ட உதவிகளை வழங்கவுள்ளார். அரசு அலுவலர்களுடான ஆய்வு பணியில் கலந்துகொண்ட பின்னர், மகளிர் சுய உதவிக்குழு மற்றும் விவசாயிகளுடனான கலந்துரையாடவுள்ளார்.
இதையும் படிங்க:கரோனா ஆய்வுக் கூட்டம்: தூத்துக்குடி விமான நிலையத்தில் முதலமைச்சருக்கு வரவேற்பு!
