தமிழ்நாட்டில் வடகிழக்குப் பருவமழை தீவிரமடைந்ததையடுத்து அனைத்து இடங்களிலும் பரவலாக மழை பெய்துவருகிறது. கன்னியாகுமரி மாவட்டத்தில் கடந்த சில நாட்களாக பெய்து வரும் கன மழையால் அம்மாவட்டத்தில் உள்ள அணைகள், குளங்கள் அனைத்தும் நிரம்பி உள்ளன. மேலும் அணைகளிலிருந்தும் குளங்களிலிருந்தும் வெளியேறும் உபரி நீரானது குடியிருப்புப் பகுதிகளிலும் விளைநிலங்களுக்குள்ளும் சென்று பாதிப்பை ஏற்படுத்தி வருகிறது.
இந்நிலையில் நேற்றிரவு முதல் விடிய விடிய கனமழை பெய்தது. நாகர்கோவிலில் இருந்து அருமநல்லூர், தடிக்காரன்கோணம் பகுதிகளுக்குச் செல்லும் முக்கிய சந்திப்பான தெரிசனங்கோப்புப் பகுதியில் வெள்ளம் ஏற்பட்டு போக்குவரத்து முற்றிலுமாக துண்டிக்கப்பட்டுள்ளது.
மேலும் அப்பகுதியைச் சுற்றியுள்ள தென்னந்தோப்பு, வாழைத் தோட்டம் ஆகியவற்றில் மழைநீர் தேங்கி பெரும் சேதங்களை ஏற்படுத்தி உள்ளது. இதேபோன்று நாகர்கோவிலுக்குச் செல்லும் முக்கிய சாலையான ஈசாந்திமங்கலம், இறச்சகுளம் உள்ளிட்ட பல்வேறு பகுதிகளிலும் வெள்ளப்பெருக்கு ஏற்பட்டு பொதுமக்கள் பெரிதும் பாதிக்கப்பட்டுள்ளனர்.
மேலும் குமரி கடல் பகுதிகளில் புயல் உருவாகியுள்ளதால், அம்மாவட்டத்தில் உள்ள பள்ளி கல்லூரிகளுக்கு இன்று விடுமுறை அளிக்கப்பட்டுள்ளது.
இதையும் படியுங்க:
