கன்னியாகுமரி மாவட்டத்தில் இந்திய அஞ்சல் துறை சார்பில் மகாத்மா காந்தியின் 150ஆவது பிறந்தநாள் விழாவை முன்னிட்டு சமூக நல்லிணக்கம் என்ற தலைப்பில் சிறப்பு அஞ்சல் உறை வெளியீட்டு விழா நடைபெற்றது.
விழாவில் சிறப்பு அஞ்சல் உறையை முதுநிலை அஞ்சல் கோட்ட கண்காணிப்பாளர் சந்திரசேகர் வெளியிட டெல்லி தேசிய காந்தி அருங்காட்சியக இயக்குநர் அண்ணாமலை பெற்றுக்கொண்டார்.
இதைத் தொடர்ந்து பேசிய சந்திரசேகர், "மகாத்மா காந்தி 1925, 1927, 1934 ஆகிய ஆண்டுகளில் கன்னியாகுமரியில் பல்வேறு நிகழ்ச்சிகளில் பங்கேற்றுள்ளார். அவரது வருகையை நினைவுகூரும் வகையிலும் அவரின் 150ஆவது பிறந்தநாளை முன்னிட்டும் சிறப்பு அஞ்சல் உறை வெளியிடப்பட்டுள்ளது.
இந்திய அஞ்சல் துறை பல்வேறு புதிய நவீன திட்டங்களை அறிமுகப்படுத்தி-வருகிறது. இதில் இந்திய அஞ்சல் பணப்பட்டுவாடா வங்கி (இந்திய போஸ்ட் பேமென்ட் பேங்க்) முக்கிய பங்கு வகிக்கிறது. இதுவரை கன்னியாகுமரியில் 1,700 பேர் அஞ்சல் வங்கி கணக்கை தொடங்கியுள்ளனர்.
கடந்த மூன்று ஆண்டுகளில் அஞ்சல் துறை வெளிநாடுகளுக்கு அனுப்பும் பார்சல் சேவை மூலம் அதிக வருவாய் ஈட்டியுள்ளது. அஞ்சல் துறை நிதிநிலை சீராக உள்ளது. கன்னியாகுமரி மாவட்டத்தில் தற்போது இரண்டு தலைமை அஞ்சல் நிலையங்கள், 78 துணை அஞ்சல் நிலையங்கள், 187 கிளை அஞ்சல் நிலையங்கள் உள்ளன.
இவற்றில் 187 கிராமப்புற அஞ்சல் ஊழியர்களுக்கு நவீன தொழில் நுட்ப வசதிகள் அடங்கிய கையடக்க கருவி வழங்கப்பட்டுள்ளது. இந்தக் கருவியில் புகைப்படம், விரல் ரேகை பதிவு, ஸ்கேனர் உள்ளிட்ட நவீன வசதிகள் இருக்கும். குமரியில் செல்வமகள் சேமிப்புத் திட்டத்தில் 30 ஆயிரம் பேர் கணக்குத் தொடங்கியுள்ளனர்.
தென் மண்டல அளவில் கடந்த ஓராண்டில் நாகர்கோவில் தலைமை அஞ்சல் அலுவலகத்தில் செயல்படும் கடவுச்சீட்டு சேவை மூலம் 13 ஆயிரத்து 687 கடவுச்சீட்டுகள் விநியோகம் செய்து முதலிடத்தில் உள்ளது" என கூறினார்.
