சென்னையைச் சேர்ந்த பெண் மருத்துவர் உள்பட ஏராளமான இளம் பெண்களிடம் சமூக வலைத்தளங்களில் பழகி, அவர்களை ஆபாசமாக படம் எடுத்து மிரட்டிய வழக்கில் கன்னியாகுமரி மாவட்டத்தைச் சேர்ந்த காசி என்பவரை குண்டர் சட்டத்தின் கீழ் காவல் துறையினர் கைது செய்து சிறையில் அடைத்தனர்.
இதைத்தொடர்ந்து காவல் துறையினர் அவரை முதற்கட்டமாக நீதிமன்ற உத்தரவுபடி மூன்று நாள் காவலில் எடுத்து விசாரணை நடத்தினர். விசாரணையில் காசி போதிய தகவல்களை தெரிவிக்கவில்லை என்று கூறப்பட்டது. அவரின் கூட்டாளிகள் இரண்டு பேரின் பெயர்களை மட்டும் காசி தெரிவித்தார்.
இதையடுத்து நாகர்கோவிலைச் சேர்ந்த டைசன் ஜினோ என்பவரைக் காவல் துறையினர் கைது செய்தனர். அவரின் மற்றொரு கூட்டாளி கவுதம் வெளிநாட்டில் உள்ளார் என்று தெரிகிறது. அவரைப் பிடிக்க விமான நிலையங்களுக்கு காவல் துறையினர் நோட்டீஸ் கொடுத்துள்ளனர்.
இதுகுறித்து காவல் துறையினர் தரப்பில் காசி கூறியதாகக் கூறப்படுவதாவது, “என்னிடம் ஏராளமான பெண்கள் தாராளமாகப் பழகியுள்ளனர். இதில் எந்த பெண்ணைப் பற்றி நான் கூற முடியும். நான் யாரையும் தேடிச் சென்று ஏமாற்றவில்லை. என்னைத் தேடி வந்தவர்களுடன் நான் ஜாலியாக இருந்துள்ளேன். எனது பணத் தேவைக்காக சில பெண்களின் நட்பை பயன்படுத்திக் கொண்டேன். நான் யாரையும் திருமணம் செய்து ஏமாற்றவில்லை. என்னுடைய பேச்சு, என் உடல் அமைப்பைப் பார்த்து பெண்களாகவே என்னைத் தேடி வந்தனர். என்னைப் பற்றி தேவையில்லாமல் புகார் அளித்துள்ள பெண்களிடம் கேட்டுப்பாருங்கள் நான் அவர்களை ஏமாற்றினேனா என்று” எனக் கூறியுள்ளார்.
இதையடுத்து, காசியின் செல்ஃபோனில் இருக்கும் வீடியோவில் உள்ள சில பெண்களிடம் விசாரணை நடத்த காவல் துறையினர் முடிவு செய்து, அவர்களது செல்ஃபோன் எண்களில் தொடர்பு கொண்டுள்ளனர். ஆனால், தொடர்புகொண்ட பெண்கள் அனைவரும் காவல் துறையினரிடம் பேச மறுத்து விட்டதாகக் கூறப்படுகிறது.
