கன்னியாகுமரி மாவட்டம் தென்தாமரைகுளம் பேரூராட்சி அலுவலகம் அமைந்துள்ள பகுதியில் மருத்துவமனைகள், வங்கிகள், வணிக வளாகங்கள், அரசு, அரசு உதவி பெறும் பள்ளிகள் உள்ளன. இப்பகுதியில் மாணவ மாணவியர்கள், பொதுமக்கள் நடமாட்டம் எப்போதும் அதிகமாகவே இருக்கும்.
இங்குள்ள பகுதிகளில் சில மாதங்களாக தெரு நாய்களின் எண்ணிக்கை அதிகரித்துக்கொண்டே வருகிறது. அதில் ஒருசில நாய்களுக்கு தோல் நோய் போன்றும் உள்ளது.
பெரும்பாலான நேரங்களில் இந்த நாய்கள் நடந்து செல்வோரையும் இருச்சக்கர வாகனங்களில் செல்வோரையும் துரத்திச் சென்று கடித்தும்விடுகின்றன. சமீப காலமாக இந்த நாய்களிடம் கடி வாங்குவோரின் எண்ணிக்கை அதிகரித்துக்கொண்டே செல்கிறது.
இது குறித்து பேரூராட்சி அலுவலகத்தில் பொதுமக்கள் புகார் தெரிவித்தும் பேரூராட்சி நிர்வாகம் எந்த நடவடிக்கையும் எடுத்ததாகத் தெரியவில்லை. இதனால் சம்பந்தப்பட்ட அலுவலர்கள் உடனடியாக இந்த நாய்கள் பெருக்கத்தைத் தடுக்க நடவடிக்கை எடுக்க வேண்டும் என அப்பகுதி மக்கள் கோரிக்கைவிடுத்துள்ளனர்.
