கன்னியாகுமரி மாவட்டம், நாகர்கோவிலை அடுத்த காரங்காடு பகுதியைச் சேர்ந்தவர் தனிஷ். இவர் ஹைதராபாத்தில் பணியாற்றி வந்தார். கரோனா ஊரடங்கு காரணமாக தனிஷ் ஹைதாராபாத்தில் இருந்து சொந்த ஊருக்கு வர முடிவு செய்துள்ளார்.
இதற்கான உரிய ஆவணங்களை ஆன்லைனில் பெற்றுக்கொண்டு நேற்று (ஜூன் 15) காலை விமானம் மூலம் திருவனந்தபுரம் விமான நிலையம் வந்தடைந்தார். அங்கு விமான நிலைய அலுவலர்கள் அவரது ஆவணங்களை சோதனையிட்டனர். பின்னர் மருத்துவப் பரிசோதனை மேற்கொண்டு, மதியம் அவரை குமரி - கேரள எல்லைப் பகுதியான களியக்காவிளை சோதனைச் சாவடியில் விட்டுச் சென்றுள்ளனர்.
இதனைத் தொடர்ந்து தனிஷ் அங்கிருந்த மாவட்ட அலுவலர்களிடம் தனது ஆவணங்களைக் காட்டி சொந்த ஊர் செல்வதற்கு முயற்சித்துள்ளார். ஆனால் அங்கு இருந்தவர்கள் யாரும் இவரைக் கண்டுகொள்ளவில்லை.
இதனைத் தொடர்ந்து, வேறு வழியின்றி களியக்காவிளையில் இருந்து குமரி நோக்கி நடக்கத் தொடங்கிய தனிஷ், ஆசாரிப்பள்ளம் அரசு மருத்துவமனைக்குச் சென்று, தனது நிலையைக் கூறி தனக்கு கரோனா பரிசோதனை செய்யும்படி கேட்டுள்ளார்.
ஆனால் அங்கிருந்த மருத்துவப் பணியாளர்கள், ஆட்சியர் அலுவலகத்திற்கு சென்று அங்கிருந்து உரிய ஆவணங்களை வாங்கி வந்தால் மட்டுமே பரிசோதனை செய்ய முடியும் எனத் தெரிவித்துள்ளனர்.
இதனைத் தொடர்ந்து தனிஷ் இன்று (ஜூன் 16) ஆட்சியர் அலுவலகத்திற்கு வந்து அங்கிருந்த அலுவர்களை சந்தித்து தனது நிலையை எடுத்துரைத்தார். இதனைக் கேட்டு அதிர்ச்சியுற்ற அலுவலர்கள், அவரை காவல் துறையினரின் உதவியுடன் ஆசாரிப் பள்ளம் அரசு மருத்துவமனைக்கு ஆம்புலன்சில் அனுப்பி வைத்தனர்.
தற்போது தனிஷ் அரசு மருத்துவமனை கரோனா சிறப்பு வார்டில் பரிசோதனைக்காக அனுமதிக்கப்பட்டுள்ளார்.
இந்நிலையில், இவ்வாறு தானாக மருத்துவப் பரிசோதனைக்கு வருபவர்களை ஆட்சியர் அலுவலகத்திற்கு சென்று ஆவணங்கள் வாங்கி வருமாறு கூறுவதை மருத்துவப் பணியாளர்கள் வாடிக்கையாகக் கொண்டுள்ளதாகவும், இதனால் ஆட்சியர் அலுவலகத்திலும்கூட கரோனா பரவ வாய்ப்புள்ளது என்றும் அப்பகுதி மக்கள் வேதனைத் தெரிவித்துள்ளனர்.
