வில்சன் கொலை வழக்கு: விசாரணைக்கு மத்திய உளவு பிரிவு நாளை வருகை

கன்னியாகுமரி: சிறப்பு காவல் உதவி ஆய்வாளர் வில்சன் கொலை செய்யப்பட்ட வழக்கில் கைது செய்யப்பட்டவர்களிடம் விசாரணை நடத்த மத்திய, மாநில உளவு பிரிவு, மற்றும் கியூ பிரிவு அலுவலர்கள் நாளை நாகர்கோவில் வரவுள்ளனர்.

கன்னியாகுமரி மாவட்டம் களியக்காவிளை சோதனைச் சாவடியில் பணியில் இருந்த சிறப்பு காவல் உதவி ஆய்வாளர் வில்சன் கடந்த 8ஆம் தேதி சுட்டுக் கொலை செய்யப்பட்டார். இந்த கொலை தொடர்பாக குமரி மாவட்டம் திருவிதாங்கோட்டையைச் சேர்ந்த அப்துல் சமீம்(25), நாகர்கோவில் கோட்டார் இளங்கடையைச் சேர்ந்த தவ்பீக்(27) ஆகியோர் கர்நாடக மாநிலம் உடுப்பியில் கடந்த 14ஆம் தேதி கைது செய்யப்பட்டனர்.

பின்னர் இருவரும் குமரி மாவட்டம் குழித்துறை நீதிமன்றத்தில் ஆஜர்படுத்தப்பட்டு பாளையங்கோட்டை சிறையில் அடைக்கப்பட்டனர். இவர்கள் மீது உபா சட்டம் உள்ளிட்ட பல்வேறு பிரிவுகளில் வழக்கு பதிவு செய்யப்பட்டது. இந்நிலையில் நாகர்கோவில் நீதிமன்றத்தில் ஆஜர்படுத்தப்பட்ட இருவரையும் 10 நாள்கள் போலீஸ் காவலில் எடுத்து விசாரிக்கவும், வருகிற 31ம் தேதி மாலை 4 மணிக்கு இருவரையும் மீண்டும் நாகர்கோவில் நீதிமன்றத்தில் ஆஜர்படுத்த வேண்டும் எனவும் நீதிபதி அருள் முருகன் உத்தரவிட்டார்.

இதைத்தொடர்ந்து இன்று 2வது நாளாக காவல்துறையினர் தொடர் விசாரணை மேற்கொண்டு வருகின்றனர். சிறப்பு காவல் உதவி ஆய்வாளர் வில்சனை கொலை செய்ய பயன்படுத்திய துப்பாக்கி, கத்தி ஆகியவை எங்கு உள்ளது என்றும் அவற்றை வேறு யாரிடமாவது கொடுத்து வைத்துள்ளனரா என்றும் இருவரிடமும் தனித்தனியாக விசாரணை மேற்கொண்டதாக காவல்துறை வட்டாரத்தில் தெரிவிக்கப்பட்டுள்ளது.

இதைப்போல் கொலை நடந்த நாளில் எங்கு தங்கியிருந்தனர்? அவர்களுடன் வந்த பிற நபர்கள் யார்? கொலைக்கு பின்பு தப்பி செல்ல அவர்களுக்கு உதவியவர்கள் யார்? போன்ற கேள்விகளுடன் விசாரணை தொடர்ச்சியாக நடைபெற்றது எனத் தெரிகிறது. இதற்கு இருவரும் முறையாக பதில்கள் எதுவும் தெரிவிக்காமல் மவுனம் காத்ததாக காவல்துறை தரப்பில் தகவல் வெளியாகியுள்ளது. மேலும் அடுத்த கட்டமாக சம்பவம் நடைபெற்ற களியக்காவிளை சோதனை சாவடிக்கு இருவரையும் நேரில் அழைத்து சென்று கொலை நடந்த விதம் குறித்து விசாரணை நடத்தவும் காவல்துறையினர் திட்டமிட்டுள்ளதாக தெரிகிறது.

இந்நிலையில் இவர்கள் இருவரிடமும் மேல் விசாரணை நடத்துவதற்காக மத்திய, மாநில உளவு பிரிவு, மற்றும் கியூ பிரிவு அலுவலர்கள் நாளை நாகர்கோவில் வரவுள்ளனர். அவர்கள் இந்தியாவின் பிற மாநிலங்கள், வெளிநாடுகளில் இருவருக்கும் உள்ள தொடர்புகள் குறித்தும், குடியரசு தினத்தை சீர்குலைக்க திட்டமிட்டனரா? என பல்வேறு கேள்விகளை எழுப்பவுள்ளதாக தகவல் கிடைத்துள்ளது. அவ்வப்போது விசாரணையில் ஏற்பட்டுள்ள முன்னேற்றம் குறித்து என்.ஐ.ஏ. அலுவலர்களுக்கும் தகவல்கள் தெரிவிக்கப்பட்டு வருகிறது.

இதையும் படிங்க: